Almatyda Túrkııa azamaty 1 mlrd teńgeden asa jalǵan shot-faktýra rásimdegen
ASTANA. KAZINFORM — Almatyda jalǵan shot-faktýra shemasyn uıymdastyrǵan sheteldik sottaldy, dep habarlaıdy Bas prokýratýranyń baspasóz qyzmeti.
Túrkııa azamaty Almatyda ózine qarasty birneshe kompanııa arqyly jalǵan shot-faktýra jazý shemasyn uıymdastyrǵan. Tergeý málimetinshe, ol is júzinde oryndalmaǵan jumystar men jetkizilmegen taýarlar úshin 1 mlrd teńgeden astam somaǵa qujat rásimdegen.
Zańsyz jolmen tapqan qarjysyn jasyrý úshin Astanadan kommertsııalyq nysan satyp alyp, ony jalǵa berip otyrǵan.
Birinshi satydaǵy sot ony kináli dep tanyp, bas bostandyǵynan aıyrý jazasyn taǵaıyndaǵan. Alaıda raqymshylyq jasaý kezinde sot zańsyz tabysqa satyp alynǵan múlikti tárkileý máselesin qarastyrmaǵan.
Keıin prokýrorlardyń kassatsııalyq narazylyǵynan soń joǵary satydaǵy sot sheshimdi ózgertti. Nátıjesinde Astanadaǵy kommertsııalyq nysan men ony jalǵa berýden túsken tabys memleket menshigine tárkilendi.
Budan buryn elektrondyq shot-faktýralar men salyq tóleý tártibinde jeńildikter engizilgenin jazdyq.
