Almatyda týrıstik nysandardyń shaǵyn sáýlettik kóshirmeleri jasaldy
ALMATY. KAZINFORM – Almatyda týrıstik nysandardyń taktıldi úlgileri ornatyldy.
Almaty ákimdiginiń málimetinshe, erekshe qajettiligi bar adamdar úshin ınfraqurylymnyń qoljetimdiligin arttyrý jáne ınklıýzıvti týrıstik ortany damytý maqsatynda qalanyń kórikti oryndarynyń 5 shaǵyn maketi daıyndaldy. Olar: Voznesensk shirkeýi, Yqylas atyndaǵy halyq mýzykalyq aspaptar mýzeıi, Abaı atyndaǵy Qazaq ulttyq opera jáne balet teatry, Almaty mýzeıi jáne Qazaqstan Respýblıkasynyń Ulttyq ǵylym akademııasy.
— Qolmen sezip tanýǵa arnalǵan úlgiler kórý qabileti buzylǵan týrısterge jáne ózge de erekshe qajettiligi bar adamdarǵa qalanyń kórikti oryndarynyń syrtqy beınesin sezinýge múmkindik beredi. Shaǵyn sáýlet nysandarynyń úsheýi ǵımarattardyń kireberis aımaqtarynda, al ekeýi ǵımarattardyń ishine ornalastyryldy, — dep habarlady ákimdikten.
Qala basshylyǵy shaǵyn nysandar erekshe qajettiligi bar kelýshilerge barynsha uzaq qyzmet etýi úshin qala turǵyndary men qonaqtaryn uqypty qaraýǵa shaqyrdy.
Eske salaıyq, buǵan deıin Almatyda sheteldik týrıster kóp baratyn mádenı-tarıhı jáne rýhanı nysandar ishinde Voznesensk shirkeýi, Qazaqstan Respýblıkasynyń Ortalyq memlekettik mýzeıi, Yqylas atyndaǵy halyq mýzykalyq aspaptar mýzeıi bar ekenin jazǵanbyz.