Almatyda týrısterdiń sany rekordtyq deńgeıge jetti
ALMATY. KAZINFORM – 2024 jyly Almatyda týrızm salasyna salynǵan ınvestıtsııa 110,9 mlrd teńgege jetti. Bul týraly Almaty qalasy ákimdiginiń baspasóz qyzmeti habarlady.
Barlyǵy 35 jańa ornalastyrý nysany ashyldy (20 qonaq úı, 4 glempıng, 8 hostel jáne 3 qonaq jaı), bul 836 bólmeniń qosylýyna múmkindik berdi.
Salanyń salyq túsimi eki esege jýyq ósip, 90,7 mlrd teńge boldy. 100 km taý baǵyty kórkeıtilip, 450 ınfraqurylym nysany men 13 kempıng aımaǵy ornatyldy.
«Kóktóbe» saıabaǵynda jańa «Densaýlyq soqpaǵy» ashylsa, «Medeý» muz aıdyny mańynda baqylaý alańdary, dúrbiler men kameralar ornatyldy. Gorelnık vızıt-ortalyǵyna aparatyn «Jumbaq jol» marshrýty iske qosyldy. 2025 jyly taǵy 10 marshrýt pen 3 kempıng aımaǵyn ashý josparlanyp otyr. Sondaı-aq, «Tselınnyı» zamanaýı mádenıet ortalyǵy men Almaty Museum of Arts ashylady.
2024 jyly qalaǵa 2,34 mln týrıst kelgen, onyń 686 myńy sheteldik, bul rekordtyq kórsetkish. Kóbine týrıster Reseı, Úndistan, Qytaı, AQSh jáne Túrkııadan kelgen.
Aıta ketelik bıyl Almatyǵa 750 myńǵa jýyq sheteldik týrıst keledi dep boljanyp otyr.