Almatyda týrıster úshin taý marshrýtynyń kartasy ázirlendi

ALMATY. KAZINFORM – Almatyda týrıster men qala turǵyndarynyń taýdaǵy qaýipsizdigin qamtamasyz etý úshin taý marshrýttarynyń kartasy paıda boldy.

«Taý marshrýttarynyń atlasynda aımaqtaǵy bes tanymal marshrýt týraly aqparat jınaqtalǵan. Atlasta tek marshrýttardyń sıpattamasy ǵana emes, sonymen qatar joryqqa daıyndyq boıynsha usynystar, qajetti qural-jabdyqtardyń bolýy, jergilikti jerlerde baǵdar alý boıynsha keńester jáne qaýipsizdik erejeleri berilgen. Bul atlas taý demalysyn unatatyndar úshin taptyrmas serik bolmaq»,- dep habarlady qalalyq Týrızm basqarmasynan.

Karta Kishi jáne Úlken Almaty shatqaldaryn qamtıdy. Bul týrısterge jergilikti jerde ońaı baǵyt alýǵa múmkindik beredi. Atalmysh karta Almatynyń tabıǵı sulýlyǵyn tereńirek zerttegisi keletin saıahatshylarǵa paıdaly.

«Taý shyńdary men qaýipsizdik» broshıýrasy – taýda qaýipsiz áreket etýge arnalǵan praktıkalyq nusqaýlyq. Onda týrıster betpe-bet kelýi múmkin qaýip-qaterler qarastyrylǵan. Broshıýra birkúndik jáne kópkúndik joryqtarǵa arnalǵan tizimdi qamtıdy, bul týrısterge kez kelgen saparǵa durys daıyndalýǵa kómektesedi», - dep atap ótti vedomstvodan.

Materıaldar Visit Almaty aqparattyq ortalyqtarynda jáne tómendegi silteme boıynsha úsh tilde tegin qoljetimdi.

Osyǵan deıin Almatyda sheteldik týrıster orta eseppen 5 kún bolatyny týraly jazǵan edik.