Almaty turǵynyna zańsyz qurylys júrgizgeni úshin aıyppul salyndy

  ALMATY. KAZINFORM — Almatyda zańsyz salynǵan taǵy bir nysan buzyldy.

Qala qurylysyn baqylaý basqarmasynan málim etkendeı, Qarasaı batyr — Jumalıev kóshesi, 126/135 mekenjaıynda salynǵan qosymsha nysan sot sheshimimen buzylyp jatyr.

— Turǵyndardyń ótinishi negizinde júrgizilgen jospardan tys tekserý barysynda menshik ıesi ruqsat qujattarynyń joqtyǵyna qaramastan qosalqy jáne kire beris nysandaryn salǵany anyqtaldy, — dep habarlady basqarmadan.

Nysan ıesi Almaty qalasynyń ákimshilik quqyq buzýshylyqtar jónindegi mamandandyrylǵan aýdanaralyq sotynyń qaýlysymen kináli dep tanylyp, aıyppul arqalady.

— Sot sheshimin oryndaý barysynda nysandy menshik ıesi ózi buzyp bastady, — dep atap ótti vedomstvodan.

Buǵan deıin taǵy bir almatylyqtyń úshinshi qabatta ornalasqan páterine zańsyz qosalqy qurylys salǵany týraly jazǵanbyz. 

Osyǵan deıin «Terekti» shaǵyn aýdanyndaǵy Aınalma kóshesi, 183 ýchaskesinde zańsyz salynǵan turǵyn úı kesheniniń buzylyp jatqany týraly jazǵanbyz.