Almatyda turǵyndardyń jeri mektep salý úshin memleket menshigine alynady

ALMATY. KAZINFORM - Almatyda 61 jyldyq tarıhy bar №98 mektepke jańa ǵımarat salynady.

Almaty ákimdiginiń málimetinshe, Medeý aýdanynda №98 mekteptiń burynnan kele jatqan máselesi bar. 1964 jyly salynǵan ǵımarat búginde tehnıkalyq talaptarǵa sáıkes kelmeıdi, ony aýystyrý qajet.

- Mektepte 640 oryn bolsa, búginde mektepte 1190 oqýshy bilim alyp jatyr. Shamadan tys júkteme oqýshylar men muǵalimderge qolaısyzdyq týǵyzyp, bilim berý sapasyna keri áser etip júr, - dep habarlady ákimdikten.

Júktemeni ýaqytsha azaıtý maqsatynda 2025 jyldyń qańtar aıynda mektepke sol mekenjaıda ornalasqan burynǵy mýzyka mektebiniń ǵımaraty berilgen. Qazir bul ǵımaratta bastaýysh synyp oqýshylary oqyp jatyr.

- Degenmen, bul máseleni tolyq sheshe almaıdy, óıtkeni aýdanda jańa oqýshylar legi áli de artyp otyr, - dep habarlady qala basshylyǵy.

Almaty ákimdigi 1500 orynǵa jańa mektep ǵımaratynyń salynýy máseleniń sheshimi bolatynyn málimdedi. Resmı málimetine sáıkes, Tátibekov, Poletaev jáne Beıimbetov kóshelerindegi jer telimderin memlekettik qajetke alý týraly qaýly qabyldandy. Qazirgi ýaqytta qurylysqa daıyndyq jumystary bastalyp ketti.

- Buǵan deıin turǵyndar usynǵan taǵy bir balama – Tekemet kóshesindegi burynǵy balabaqsha ǵımaratyn satyp alý nusqasy da qaralǵan. Alaıda ol nysan zıratqa jaqyn sanıtarlyq-qorǵaý aımaǵynda ornalasqan, kireberis joldary tar, al tyǵyz qurylys saldarynan kólik qoljetimdiligi men qaýipsiz jaıaý jol jasaý múmkin bolmaǵan, - delingen ákimdik aqparatynda.

Eske salaıyq, buǵan deıin 1 qyrkúıekte Almatyda qansha mektep ashylatynyn jazǵanbyz.