Almatyda turǵyndar kóshede kúdik týdyrǵan er adamdy polıtsııaǵa tapsyrdy
ALMATY. KAZINFORM – Almatynyń Túrksib aýdanynda turǵyndardyń qyraǵylyǵynyń arqasynda kúdikti er adam ustaldy. Onyń janynan untaq tárizdi zat salynǵan birneshe túıinshek tabylyp, olardyń quramy saraptamaǵa jiberildi.
Oqıǵa keshki ýaqytta jeke turǵyn úı sektorynda bolǵan. «102» arnasyna habarlasqan turǵyndardyń aıtýynsha, beıtanys azamat kóshelerdi aralap júrip, esirtki jasyrǵan oryndardy izdep júrgendeı kúdik týdyrǵan.
Habarlama boıynsha oqıǵa ornyna polıtsııanyń jedel ekıpajy jiberildi. Sol ýaqytqa deıin belsendilik tanytqan jergilikti turǵyndardyń biri kúdiktini toqtatyp, quqyq qorǵaý organdarynyń qyzmetkerlerine tapsyrǵan.
Tergeý-jedel toby júrgizgen jeke tintý kezinde er adamnyń janynan untaq tárizdi zat salynǵan birneshe túıinshek tárkilendi. Polıtsııanyń málimetinshe, ustalǵan adam – Almaty qalasynyń 33 jastaǵy jumyssyz turǵyny. Aldyn ala málimet boıynsha, ol esirtki qoldanatynyn aıtyp, «jyldamdyq» dep atalatyn sıntetıkalyq esirtkiniń jasyrylǵan ornyn izdep júrgenin jetkizgen.
– Tárkilengen túıinshekterdiń naqty quramyn jáne olardyń qandaı zat ekenin sot-hımııalyq saraptama anyqtaıdy, - delingen habarlamada.
Polıtsııa turǵyndardy kúmándi jaǵdaılar men zańsyz áreketterge tap bolǵan jaǵdaıda ýaqyt joǵaltpaı quqyq qorǵaý organdaryna habarlaýǵa úndedi.
Eske salaıyq, buǵan deıin Almaty oblysynda VIP-klıentterge esirtki satqan top ustalǵanyn jazǵan edik.
