Almatyda turǵyn úılerdegi jumys istemeıtin beınekameralarǵa kim jaýapty
Almaty turǵyny áleýmettik jeldie 2015 jyldan beri úıiniń podezinde jumys istemeıtin beıne baqylaý júıesiniń qyzmeti úshin aqy tólep kele jatqanyn jazdy, dep habarlaıdy Kazinform.
Qala turǵyny nelikten beınebaqylaý júıesine aqy tóleýden bas tartatynyn aıtqan.
«Men bul qyzmet úshin 2015 jyldan beri tólep keldim. Beıne kameradaǵy jazbalardy berýleri úshin birneshe ret servıs qyzmetkerlerin shaqyrǵan edim. Beıne kameralardyń jumys istemeıtini belgili boldy. Osydan soń atalǵan qyzmetti usynatyn kompanııaǵa mundaı qyzmetteri qajet emes ekenin jáne túbirtekten osy qyzmet túrin alyp tastaý týraly hat jazdym. Sondaı-aq kelisim-sharttyń tolyq kóshirmesin suraǵan edim.. Alaıda, ol kóshirmeni ala almadym», - dep jazdy qala turǵyny.
Atalǵan máselege baılanysty Almaty ákimdigine saýal joldaǵan edik. Almaty qalasy kommýnaldyq ınfraqurylymdy damytý basqarmasynan jaýap keldi.
Vedomstvonyń málimetinshe, «QR turǵyn úı qatynastary týraly» zańynyń 18-babynyń 3-tarmaǵyna sáıkes, páterlerdiń, turǵyn emes úı-jaılardyń ıeleri kondomınıým obektisin basqarýǵa jáne kondomınıým obektisiniń ortaq múlkin kútip-ustaýǵa arnalǵan shyǵystarǵa qatysady jáne osy zańda kózdelgen mindetterdi atqarady.
«Sonymen qatar, páter ıeleriniń birlestikteri nemese basqarýshy kompanııalar óz qalaýy boıynsha merdiger uıymdarmen kommertsııalyq negizde sharttar jasaıdy. Qandaı da bir tehnıkalyq aqaýlar bolǵan jaǵdaıda, úı turǵyndary turǵylyqty jeri boıynsha qyzmet kórsetetin kommýnaldyq uıymǵa tikeleı júginýge tıis», - dep habarlady qalalyq kommýnaldyq ınfraqurylymdy damytý basqarmasy
