Almatyda turǵyn úıler arasynan qarý men granatalar tabyldy
ALMATY. KAZINFORM – Almatynyń Medeý aýdanynda qarý-jaraq jasyrylǵan oryn anyqtaldy.
Qalalyq polıtsııa departamentiniń málimetinshe, Ekstremızmge qarsy is-qımyl basqarmasynyń qyzmetkerleri Medeý aýdandyq polıtsııa qyzmetkerlerimen birlesip, qarý-jaraq pen oq-dáriler jasyrylǵan oryndy tapty. Jasyryn oryn jeke turǵyn úıler ornalasqan aýmaqta «Qarý» jedel-profılaktıkalyq is-sharasy barysynda anyqtalǵan.
- Astrahan kóshesindegi úılerdiń biriniń mańynda, jol boıynan TOZ-25 tegis uńǵyly myltyǵy tabyldy. Ol kesilgen myltyqqa aınaldyryp qaıta jasalǵan. Sondaı-aq tapanshaǵa uqsas zat pen ártúrli kalıbrli oq-dáriler anyqtaldy. Odan bólek jaryq-dybys granatalaryn qosa alǵanda, birneshe granata men qaýipti bolýy múmkin ózge de zattar tárkilendi, - dep habarlady departamentten.
Atalǵan derek boıynsha qylmystyq is qozǵaldy. Tárkilengen zattar tıisti zertteýge jiberilgen. Polıtsııa qarýdyń qaıdan kelgenin, qalaı saqtalǵanyn jáne oǵan kimderdiń qatysy bolýy múmkin ekenin anyqtap jatyr.
Eske salaıyq, Almaty taýlarynda qarý men oq-dári tabyldy. Atap aıtqanda: IJ markaly tegis uńǵyly myltyq, tapanshaǵa uqsas zat jáne 16-kalıbrli alty oq-dári anyqtaldy.
