Almatyda turǵyn úıde mefedron óndiretin esirtki zerthanasy joıyldy
ASTANA. KAZINFORM — Almaty qalasynda polıtsııa qyzmetkerleri sıntetıkalyq esirtki óndiretin shaǵyn esirtki zerthanasyn joıdy
— Jedel ýákilderdiń nazaryna kópqabatty turǵyn úı kesheninde «mefedron» sıntetıkalyq esirtkisin daıyndaý arqyly esirtki bıznesin jolǵa qoıǵan qalanyń 34 jastaǵy turǵyny ilikti. Shaǵyn zerthananyń ereksheligi — qaskúnem jaǵymsyz ıis, gazdarmen kórshilerdiń nazaryn aýdarmaý úshin óndiristi ǵımarattyń eń joǵarǵy qabatynda ári sorǵyshty úıdiń jeldetkish shahtasyna qosý arqyly arnaıy uıymdastyrǵan.
Páterdi tintý kezinde bir kılogramm daıyn ónim, krıstaldary bar alty shyny naýa, dıhlormetan quıylǵan alty bótelke, reaktıvteri bar toǵyz kanıstr, zerthanalyq ydystar, elektrondy tarazylar jáne jeke qorǵanysqa arnalǵan kıim tabyldy. Tárkilengen esirtkiniń jalpy salmaǵy 4,5 kg, — dedi ІІM esirtki qylmysyna qarsy is-qımyl komıtetiniń basqarma bastyǵy Baqytjan Ámirhanov.
Esirtkini uıymdastyrý jáne óndirý faktisi boıynsha Qylmystyq kodekstiń 297-1-babyna sáıkes sotqa deıingi tergep-tekserý bastaldy. Kúdiktige ómir boıyna bas bostandyǵynan aıyrýǵa deıingi jaza qarastyrylýy múmkin.
Aıta ketelik Aqtóbede esirtki saýdasy: 22 karta arqyly 400 mln teńgeden astam qarjy ótkeni týraly jazǵan edik.
