Almatyda turǵyn úıdi kútip ustaý tarıfteri 10 jyl ózgermegen: PIK qaıta qaraýdy usyndy

ALMATY. KAZINFORM – Almaty qalasynyń PIK qaýymdastyǵy kóppáterli turǵyn úılerdi basqarý jáne kútip ustaýdyń mınımaldy tarıfin qaıta qaraýdy usyndy.

Qaýymdastyqtan málim etkendeı, tarıfter 10 jyldan astam ýaqyt ózgermegen. Osy ýaqyt ishinde úılerdi kútip ustaýǵa jáne olardyń qaýipsizdigin qamtamasyz etýge ketetin shyǵyndar aıtarlyqtaı ósti. Qazir Almatydaǵy tarıf ár sharshy metr úshin 7 teńgeden 700 teńgege deıingi somada.

«Bul rette ortasha kórsetkish nebári - 40 teńge. Mundaı tarıf yńǵaıly jaǵdaılar jasap, turǵyn úılerdi kútip-ustaýǵa qajet jumystardy júrgizýge jetkiliksiz», - dep túsindirdi PIK qaýymdastyǵynyń tóraǵasy Arkadıı Rýbtsov.

Aıtýynsha,qazirgi tarıf tehnıkalyq qyzmet kórsetý, turaqty dezınfektsııa, deratızatsııa jáne jóndeý jumystary sııaqty mańyzdy shyǵyndardy múlde jappaıdy. Bul óz kezeginde turǵyndardyń jaıly ómir súrýine qolaısyzdyq pen qaýip týdyrady.

Odan bólek, jańa standarttar basqarýshy kompanııalardan turǵyndardyń qaýipsizdigin qamtamasyz etýge baǵyttalǵan qosymsha sharalardy atqarýdy talap etedi.Bul maqsattarǵa da qosymsha qarjy qajet.

«Qaýymdastyq baspana sapasy men turǵyndardyń qaýipsizdigin arttyrýǵa qatysty máseleni sheshýde qala bıligi men almatylyqtardyń qoldaýyna úmit artyp otyr»,- dedi ol.

Aıta keteıik, Almatyda bıyl 100 kóppáterli turǵyn úıge kúrdeli jóndeý júrgizildi.