Almatyda turǵyn úı janyna zańsyz salynǵan nysandar súrilip jatyr

ALMATY. KAZINFORM – Naýryzbaı batyr kóshesi, 41 mekenjaıda ornalasqan turǵyn úıdiń janyna zańsyz salynǵan eki qosymsha nysan sot sheshimimen súriletin bolady. 

Almaty ákimdiginiń málimetinshe, turǵynnyń ótinishi boıynsha jospardan tys tekserý júrgizilip, nátıjesinde turǵyn úıdiń eki jaǵynan da qosymsha qurylystardyń zańsyz salynǵany ári jalpy paıdalanylatyn aýmaqta ruqsat qujattarynyń bolmaǵany anyqtalǵan.

— Menshik ıesine (jeke tulǵaǵa) qatysty ákimshilik sharalar qabyldandy. Keıin Almaty qalasynyń ákimshilik quqyq buzýshylyqtar jónindegi mamandandyrylǵan aýdanaralyq sotynyń qaýlysymen menshik ıesi kináli dep tanylyp, oǵan ákimshilik aıyppul salyndy jáne zańsyz salynǵan qosalqy nysandar májbúrli túrde buzylatyn boldy, — dep habarlady ákimdikten.

Menshik ıesi qosalqy nysannyń bireýin óz erkimen buzǵan. Al ekinshi qosymsha qurylysty májbúrli túrde súrý búgin, sot sheshimine sáıkes, sot oryndaýshylarynyń qatysýymen júrip jatyr.

Eske salaıyq, buǵan deıin Almatyda zańsyz salynǵan turǵyn úı kesheni buzylyp jatqanyn jazǵanbyz.