Almatyda turǵyn úı mańynda áıeldiń máıiti tabyldy

ALMATY. KAZINFORM — Almaty polıtsııasy bul faktige baılanysty qylmystyq is qozǵady.

Jelidegi málimetke sensek, áıel «Komfort sıtı» turǵyn úı kesheniniń 18-shi qabatynan sekirip, mert bolǵan. Qolynda 4 jasar balasy bolǵan. 

— Bul derek boıynsha Bostandyq aýdandyq polıtsııa basqarmasy qylmystyq is qozǵady. Oqıǵanyń sebebi men mán-jaıy anyqtalyp jatyr, — dep habarlady qalalyq polıtsııa departamentinen.

Qalalyq densaýlyq saqtaý basqarmasynyń málimetinshe, 2021 jyly týǵan balany jedel járdem brıgadasy Balalar shuǵyl medıtsına ortalyǵyna jetkizgen.

— Bala kóptegen jaraqat alǵan, jaǵdaıy óte aýyr. Reanımatsııa jáne qarqyndy terapııa bólimine jatqyzyldy. DSM dıagnostıka jáne emdeý hattamasyna sáıkes tolyq kólemde em qabyldap jatyr, — deıdi basqarmadan. 

Eske salaıyq, byltyr «Teremkı» turǵyn úı kesheninde osyǵan uqsas oqıǵa bolǵanyn jazǵanbyz. Áıel kópqabatty úıdiń terezesinen qulap mert boldy.

Odan keıin Almatyda kópqabatty úıden qulaǵan eki jasóspirim kóz jumǵanyn jazǵan edik.