Almatyda turǵylyqty jeri boıynsha tirkelý tártibi ózgeredi: kimderge jeńildik jasalady
ALMATY. KAZINFORM – Almatyda azamattardy turǵylyqty jeri jáne ýaqytsha bolatyn jeri boıynsha tirkeý normatıvterine ózgeris engizý josparlanyp otyr.
Qala ákimdigi ázirlegen jobany máslıhat talqylaýǵa shyǵardy. Qujattaǵy basty jańashyldyq basqa óńirlerden kelgen stýdentterge qatysty bolmaq.
Qoldanystaǵy erejege sáıkes, Almatyda bir adamdy tirkeý úshin turǵyn úıdiń jalpy aýmaǵynda keminde 15 sharshy metr jer bolýy kerek. Mysaly, jalpy aýmaǵy 60 sharshy metr bolatyn páterge osy normatıv boıynsha tórt adamdy tirkeýge bolady. Al úı ıesiniń týystary men basqa da keıbir sanattaǵy azamattarǵa bul talaptan erekshelik qarastyrylǵan.
Endi qala ákimdigi jeńildik beriletin sanattar tizimin tolyqtyrýdy usynyp otyr. Atap aıtqanda, oǵan Almatyda kúndizgi oqý bóliminde bilim alatyn stýdentterdi qospaq. Eger túzetý qabyldansa, olardy turǵyn úı aýmaǵyna qoıylatyn belgilengen talapqa qaramastan tirkeýge múmkindik beriledi.
Qala ákimdigi ókilderiniń aıtýynsha, jańa sheshim halyqty esepke alý tártibin retteýge, ishki kóshi-qon úderisterin baqylaýdy kúsheıtýge jáne megapolıste memlekettik qyzmetterdi tıimdi josparlaýǵa múmkindik beredi. Sonymen qatar qalada zańdy túrde turý rásimin jeńildetý arqyly stýdentterdiń quqyqtaryn qorǵaý kózdelgen.
Aıta keteıik, qujat jobasy 6 qarashada jarııalanǵan. Qoǵamdyq talqylaý 23 qarashaǵa deıin jalǵasady.
Qazirgi ýaqytta máslıhat sheshiminiń jobasy jarııa talqylaý kezeńinen ótip jatyr. Odan keıin qujat Almaty qalasy máslıhatynyń depýtattaryna bekitýge jiberiledi.
Eske salsaq, Almaty azamattardy tirkeý úshin turǵyn úı kólemi standartyn belgilegen edi.
