Almatyda jer silkindi: qutqarýshylar seısmıkalyq oqý-jattyǵý ótkizdi
ALMATY. KAZINFORM – Almatyda tótenshe jaǵdaı mamandary joıqyn jer silkinisi bolǵan jaǵdaıda qalaı áreket etý kerektigin pysyqtady.
Almatyda tańǵy saǵat 10:00-de qosylǵan dabyl shahar turǵyndaryn eleń etkizdi. Bul qutqarý qyzmetiniń zilzalaǵa daıyndyǵyn pysyqtaý bolatyn. Jalpy qalalyq oqý-jattyǵý kezinde mektep oqýshylary syrtqa shyǵarylyp, evakýatsııalyq núktelerdiń múmkindigi tekserildi.
Qalady shartty túrde jer silkindi. Jaǵdaı kúrdeli. Órt shyǵyp, túrli apattar boldy. Qutqarýshylar jedel qımyldap, turǵyndardy qaýipsiz jerge shyǵarý órtti sóndirý jáne adamdardy qutqarý jumystaryna kiristi.
Almaty garnızonynyń áskerı qyzmetshileri múmkindigi shekteýli adamdardy qaýipsiz oryndarǵa evakýatsııalady.
Qulager shaǵynaýdanynyń kóppáterli turǵyn úıinde órtti sóndirý boıynsha avarııalyq-qutqarý jumystary júrgizildi.
Ortalyq stadıonda lager, dalalyq as úı, sondaı-aq medıtsınalyq kómekke arnalǵan modýldik medıtsınalyq gospıtal ornalasty.
Almaty qalalyq tótenshe jaǵdaılar departamenti habarlaǵandaı, seısmıkalyq oqý-jattyǵýdyń negizgi maqsaty – qala turǵyndarynyń tótenshe jaǵdaı kezindegi is-qımylǵa daıyndyǵyn arttyrý, turǵyndardy evakýatsııalaý joldaryn, qaýipsiz jerlerdi aldyn ala anyqtap, apattyq chemodan daıyndaý boldy.
Jattyǵýǵa azamattyq qorǵaý qyzmetteriniń jáne Almaty garnızonynyń áskereleriniń jeke quramynan 1100 adam men 60 tehnıka tartyldy.
