Almatyda Turan órkenıetin zertteıtin halyqaralyq zertteý ortalyǵy ashyldy
ALMATY. KAZINFORM – Almatyda Ulttyq ǵylym akademııasynyń janynan «Uly dala: Turan órkenıeti» halyqaralyq zertteý ortalyǵy resmı ashylýy ótti. Ol Turan ýnıversıtetiniń bazasynda ornalasqan.
UǴA málimetine sáıkes, ortalyqtyń negizgi maqsaty – halyqaralyq zertteý habyn qalyptastyrý jáne halyqaralyq akademııalyq keńistikti qamtıtyn kópdeńgeıli ǵylymı jeliniń irgetasyn qalaý. Bastama alǵash ret 2025 jyldyń jeltoqsanynda akademıktermen ótken kezdesýde usynylyp, qysqa ýaqyt ishinde halyqaralyq zertteý ortalyǵyna aınalǵan.
- Ǵylymı ortalyqta «Turan Civilization Digital Atlas» platformasy, tsıfrlyq arhıvter men jańa bilim berý baǵdarlamalary arqyly GIS, jasandy ıntellekt jáne ınteraktıvti kartografııany gýmanıtarlyq zertteýlerge engizý kózdeledi, bul ǵylymı nátıjelerdiń keń qoljetimdiligin qamtamasyz etedi, - dedi QR Prezıdentiniń janyndaǵy Ulttyq ǵylym akademııasynyń prezıdenti Aqylbek Kúrishbaev.
QR Ǵylym jáne joǵary bilim mınıstri Saıasat Nurbek «Uly dala: Turan órkenıeti» halyqaralyq zertteý ortalyǵynyń qurylýy – Uly dalany tutas órkenıettik keńistik retinde ǵylymı turǵydan zerdeleýge, Ortalyq Eýrazııanyń tarıhı-mádenı murasyn jańasha paıymdaýǵa jáne zamanaýı tehnologııalardy gýmanıtarlyq zertteýlermen ushtastyrýǵa baǵyttalǵan mańyzdy qadam ekenin atap ótti.
Іs-sharaǵa Qyrǵyz Respýblıkasy, Ózbekstan, Túrikmenstan, Túrkııanyń konsýldary men dıplomatııalyq ókilderi, sondaı-aq halyqaralyq uıymdardyń ókilderi, joǵary oqý oryndary men ǵylymı uıymdardyń basshylary, akademıkter men jetekshi sarapshylar qatysty.
Eske salaıyq, Almatyda jaqyn ýaqytta balalarǵa arnalǵan alǵashqy ǵylym mýzeıi ashylady.
