Almatydaǵy Tuńǵysh Prezıdent saıabaǵy jabylady
ALMATY. KAZINFORM – Tuńǵysh Prezıdent saıabaǵy jańǵyrtý jumystaryna baılanysty ýaqytsha jabylady.
Almatynyń Qoǵamdyq keńistikterdi damytý basqarmasynyń málimetinshe, saıabaqty jańǵyrtý jumystary jalǵasyp jatyr. Qurylys-montaj jumystary júrgiziletin kezeńde saıabaq aýmaǵy kelýshiler úshin tolyqtaı jabylady.
- Saıabaqta ınjenerlik jáne júrginshiler joly jańartylyp, aýmaqty keshendi kórkeıtý men kógaldandyrý jumystary júrgiziledi. Jańǵyrtý kezinde qala turǵyndary men qonaqtary jaqyn ornalasqan Flow Park demalys ornynda serýendeı alady, - dep habarlady basqarmadan.
Almaty ákimdigi jumystardyń aıaqtalý merzimi men saıabaqtyń ashylatyn kúni týraly qosymsha habarlaıdy.
Eske salaıyq, buǵan deıin Almaty-1 vokzalyn jańǵyrtý jumystary qalaı júrip jatqanyn jazǵanbyz.
