Almatyda túngi ýaqytta ishimdik satqan dúken ıelerine aıyppul salyndy
ALMATY. KAZINFORM – Megapolıste 9 shaǵyn dúkeniń túngi ýaqytta alkogoldik ishimdikter satqany belgili boldy.
Almaty polıtseıleri ótken demalys kúnderi shahardyń ortalyq bóliginde arnaıy is-shara ótkizdi. Onyń barysynda bar, dámhana, túngi klýbtar men keshki saǵat 21.00-den keıin alkogoldik ónimder satatyn azyq-túlik dúkenderine tekserý júrgizdi.
«Nátıjesinde 37 adam QR ÁQBtK-niń 441-baby boıynsha jaýapkershilikke tartyldy. Sonymen qatar 9 shaǵyn dúken ákimshiligine túngi ýaqytta alkogoldik ishimdikterdi satqany úshin aıyppul salyndy. Reıdtik is-sharalar josparyn jasaý kezinde qala turǵyndarynyń dabyldary eskerilip, kórsetilgen aýmaqtar boıynsha qandaı da bir quqyq buzýshylyqtardyń jasalýyna taldaý júrgizildi. Jergilikti is-sharalar, ásirese demalys jáne mereke kúnderi turaqty túrde ótkiziletin bolady», – deıdi, Medeý aýdandyq polıtsııa basqarmasynyń basshysy Іlııas Ómirserikov.
Sondaı-aq ol qala boıynsha qoǵamdyq oryndarda kalıan shegýdiń 120-dan astam deregi anyqtalǵanyn málim etti.
