Almatyda túngi nóserge daıyndyq kúsheıtildi
ASTANA. KAZINFORM — Almatyda aýa raıynyń nasharlaýyna baılanysty kommýnaldyq jáne tótenshe jaǵdaılar qyzmetteri kúsheıtilgen kezekshilik rejımine kóshedi.
«Qazgıdromet» boljamynsha, 4 qazan saǵat 21:00–den keıin qalada azdaǵan jańbyr jaýýy múmkin. Tún ortasynan keıin jaýyn-shashyn kúsheıip, keı ýaqyttarda 15-20 mm-ge deıin nóser jańbyr jaýady dep boljanyp otyr.
Jaýyn-shashyn 5 qazan tańerteń birtindep báseńdep, saǵat 12:00–ge deıin toqtaıdy. Sonymen qatar soltústik-batystan soǵatyn jeldiń ekpini 15-18 m/s-qa deıin jetýi múmkin.
Jaýyn saldarynan sý basý qaýpiniń aldyn alý úshin qalada 70 mobıldi brıgada kezekshilikke shyǵady. Olardyń jumysyna 337 arnaıy tehnıka, 103 motopompa jáne 2,4 myń qum salynǵan qap daıyndaldy.
— Kezekshilikke kommýnaldyq jáne tótenshe jaǵdaılar qyzmetiniń 717 mamany jumyldyrylady. Negizgi kúsh sý jınalý qaýpi joǵary ýchaskelerge baǵyttalady. Bul aýmaqtarda assenızatorlyq mashınalar da kezekshilik etedi, — delingen habarlamada.
Jol salasy qyzmetkerleri motopompalarmen jáne qajetti qural-jabdyqtarmen qamtamasyz etilgen.
Jalpy táýlik boıy kezekshilikke 3 080 jol jumysshysy men 1 225 arnaıy tehnıka tartylady. Jumysqa «Almaty Tazalyq» MKK jáne jeke merdiger uıymdar qatysady.
Aldyn ala boljam boıynsha, 6 qazanda Almatyda kóshpeli bultty aýa raıy saqtalyp, jaýyn-shashyn bolmaıdy.
Eske salaıyq, buǵan deıin Aqtóbede alǵashqy qar jaýǵanyn jazǵanbyz.
