Almatyda túnde jaýǵan qardan keıin 17 jol apaty tirkeldi
ALMATY. KAZINFORM – Almatyda 4 qazan kúni saǵat 18:00-den 5 qazan 06:00-ge deıin 17 jol-kólik oqıǵasy tirkeldi. Qaza bolǵandar joq, alty adam jaraqat aldy.
Polıtsııanyń málimetinshe, jol apatynyń basym bóligi qashyqtyqty saqtamaý, jyldamdyqty durys tańdamaý jáne jol qozǵalysyna qatysýshylardyń jaýapsyzdyǵynan bolǵan.
– Alǵashqy qardyń jaýýy ádette júrgizýshiler men jaıaý júrginshiler úshin qıyndyq týdyrady. Mundaı jaǵdaıda joldyń beti taıǵaq bolyp, tejeý joly uzarady. Degenmen kóp júrgizýshi aýa raıy men jol jaǵdaıyn eskermeı, burynǵy jyldamdyqpen qozǵala beredi. Biz barlyǵyn óte saq bolýǵa, jyldamdyqty azaıtýǵa, kenetten manevr jasaýdan aýlaq bolýǵa jáne jol qaýipsizdigi árkimge baılanysty ekenin este saqtaýǵa shaqyramyz, - dedi Almaty polıtsııa departamenti Qoǵamdyq qaýipsizdik basqarmasy bastyǵynyń orynbasary Tımýr Noǵaıbaev.
Almaty ákimdiginiń málimetinshe, jaýǵan qardyń qalyńdyǵy qalada shamamen 1 sm, taýly aımaqta 10 sm-ge deıin.
Qazir qala kóshelerinde 918 arnaıy tehnıka jáne 2 550 jol jumysshysy qyzmet atqaryp jatyr.
– Negizgi magıstralder, kópirler, jol aıryqtary, eńister men kóterilister, trotýarlar jáne aıaldama aımaqtary kóktaıǵaqqa qarsy materıaldarmen óńdelip jatyr. Jumystar táýlik boıy júrgizilip jatyr, - dep habarlady ákimdik.
Eske salaıyq, keshe, 4 qarasha kúni keshke Almatyda alǵashqy qar jaýǵanyn jazǵanbyz.