Almatyda tumaýǵa qarsy ekpe egý bastaldy
Almatyda búginnen, 25 qyrkúıekten bastap qalanyń barlyq emhanasynda tumaýǵa qarsy ekpe egý naýqany bastaldy, dep habarlaıdy, QazAqparat tilshisi.
Almaty qalalyq qoǵamdyq densaýlyq saqtaý basqarmasynyń málimetinshe, halyqty ımmýndaý úshin tumaýǵa qarsy «Grıppol+» vaktsınasynyń 250 myń dozasy satyp alyndy. «Grıppol+» ınaktıvatsııalanǵan vaktsına Reseıde óndirilgen jáne quramynda tumaý vırýsynyń A (H1N1 jáne H3N2) jáne V qosalqy tıpiniń shtamdary bar.
«Egýge birinshi kezekte medıtsına qyzmetkerleri, medıtsınalyq mekemelerde esepte turǵan, jetim jáne ata-anasynyń qamqorlyǵynsyz qalǵan balalar, júkti áıelder men 60 jastan asqan adamdar jatady. Negizgi aýrýǵa baılanysty tumaýdyń neǵurlym aýyr túrine beıim adamdar da vaktsınatsııalanýy kerek», - dep atap ótti vedomstvodan.
Dárigerlerdiń aıtýynsha, vaktsınatsııa naýqany qarasha aıynyń sońyna deıin jalǵasady. Tumaýǵa qarsy ekpeden keıin tolyq ımmýnıtetke jetý úshin eki apta qajet. Osy ýaqyt ishinde tumaý jáne basqa vırýstyq aýrý belgisi bar adamdarmen qarym-qatynasty shektegen jón. Dárigerler tumaý asqyný men ólim qaterine baılanysty qaýipti ekenin eske salady. Vaktsınatsııa tumaýdyń aldyn alýdyń jáne aýyr asqynýdyń qaýpin azaıtýdyń eń jaqsy ádisi.
«Tumaýdyń aldyn alý úshin adamdar kóp jınalatyn jerge barýdy shektep, úı-jaıdy únemi jeldetý kerek. Sondaı-aq múmkindiginshe, aýyrǵan adamdarmen qarym-qatynasty azaıtqan durys. Eger tumaý nemese JRVI belgileri paıda bolsa, dereý medıtsınalyq kómekke júgingen abzal», - dep atap ótti qalalyq densaýlyq saqtaý basqarmasynan.
