Almatyda tumaýǵa qarsy 200 myń reseılik vaktsına satyp alyndy

ALMATY. KAZINFORM – Almatyda ótken jylmen salystyrǵanda tumaý juqtyrǵandar sany 8,1%-ǵa azaıǵan. Bul týraly Almaty qalasynyń Sanıtarııalyq-epıdemıologııalyq baqylaý departamentiniń basshysy Qasymhan Alpysbaıuly aıtty. 

Onyń aıtýynsha, jyl basynan beri qala aýmaǵynda JRVI-nyń 10 802 jaǵdaıy tirkelgen. Árbir 100 myń turǵynnyń 484 tumaý juqtyrǵan. Bul ótken jyldyń uqsas kezeńindegi kórsetkishten 8,1%-ǵa tómen (444). Infektsııa juqtyrǵandardyń 62,1%-y balalar, ıaǵnı 6 712 jaǵdaı.

– 2024 jylǵa jergilikti bıýdjet qarajatyna «táýekel tobyndaǵy» adamdardy vaktsınatsııalaý úshin reseılik 200.000 doza mólsherinde úsh valentti tumaýǵa qarsy «Grıppol Plıýs» vaktsınasy satyp alyndy. Vaktsına bıyl qyrkúıek aıynyń ekinshi onkúndiginde jetkiziledi dep kútiledi. Vaktsınatsııa tumaýǵa qarsy ekpelerdiń túsýine qaraı bastalady jáne 2024 jyldyń 1 jeltoqsanyna deıin tirkelgen jeri boıynsha emhanalarda jalǵasady, - dedi departament basshysy.

Sonymen qatar ońtústik megapolıstiń epıdemıologtary JRVI, tumaýmen syrqattanýshylyqtyń órshýi kezeńinde halyqqa aldyn alý sharalaryn saqtaýdy usynady:

– dárigerdiń taǵaıyndaýymen ımmýndaý júıesin kóterý: S dárýmenin, oksolın jaqpa maıyn qoldaný;

– jappaı is-sharalar ótetin oryndarǵa barýdy qysqartý, bólmelerdi ylǵaldy shúberekpen jınaý, jeldetý, JRVI-men naýqastanǵandarmen qarym-qatynasta bolmaýǵa tyrysý, qarym-qatynasta bolǵan jaǵdaıda betperde kıip, jeke gıgıena erejelerin saqtaý qajet;

– aýryp qalǵan jaǵdaıda úıde bolý, ózin-ózi emdemeı, medıtsına qyzmetkerin shaqyrý qajet. Túshkirý jáne jótelý kezinde aýyzdy qolmen, maılyqpen, oramalmen jaýyp, qoldy múmkindiginshe jıi jýý qajet;

– naýqas balalardy mektepterge, mektepke deıingi balalar mekemelerine, mádenı-buqaralyq is-sharalar ótkiziletin oryndarǵa jibermeý.

Eske salaıyq, buǵan deıin Almatyda bıyl 62 bala kókjótel juqtyrǵanyn jazǵanbyz.