Almatyda tuman men kóktaıǵaq bolady — TJD eskertý jasady

ALMATY. KAZINFORM — Almatyda 10 jeltoqsanda qar jaýyp, keı jerlerde tuman men kóktaıǵaq bolady.

Qazgıdromet boljamyna sáıkes, taýly aýdandarda qar qalyń túsedi, tuman men kóktaıǵaq baıqalady. Jeldiń baǵyty — soltústik-batystan soltústik-shyǵysqa aýysady, ekpini sekýndyna 15-20 metrge deıin jetýi múmkin.

Mundaı aýa raıyna baılanysty Almaty qalasynyń Tótenshe jaǵdaılar departamenti kólik júrgizýshileri men jaıaý júrginshilerdi kóktaıǵaq kezinde muqııat bolýǵa shaqyrdy.

— Kólik júrgizýshilerine óz kólikterin aǵashtardyń, elektr jelileriniń jáne basqa da qulaý qaýpi bar konstrýktsııalardyń astyna qoımaýǵa keńes beriledi, — dep habarlady TJD.

Sondaı-aq qutqarýshylar kóktaıǵaq kezinde jaraqat alý qaýpin azaıtý úshin kelesi qaýipsizdik erejelerin saqtaýdy usyndy:

— Joldy tek jol júrý erejelerine sáıkes belgilengen jerlerden kesip ótińiz;
— Ásirese joldy kesip ótý kezinde muqııat bolyńyz, bóten nárselerge (mysaly, telefonmen sóılesý jáne t. b.) alańdamańyz;
— Árdaıym aldyńyzǵa jáne aıaǵyńyzdyń astyna qarap júrińiz;
— Tabany jalpaq, syrǵymaıtyn jáne bederli aıaq kıim tańdańyz;
— Qoldaryńyzdy qaltada ustamańyz — bul tepe-teńdikti saqtaýǵa kómektesedi;
— Trotýarlar, aıaldamalar, dúkenderge kireberis baspaldaqtar — adamdar jıi qulaıtyn oryn ekenin umytpańyz.

Eske salaıyq, Almatyda 8 jeltoqsanda «qara jańbyr» jaýǵanyn jazǵanbyz.