Almatyda «Tulpar» kesheni memleketke qaıtaryldy: nysanda ne ózgeredi

ALMATY. KAZINFORM — Almatyda «Tulpar» kesheni qalanyń kommýnaldyq menshigine qaıtaryldy. 

Almaty ıppodromynyń janynda ornalasqan «Tulpar» at sporty kesheni keıingi jyldary jekemenshikte boldy. Alaıda qalalyq sport basqarmasynyń málimetinshe, Jetisý aýdandyq prokýratýrasy 2019 jyldyń 5 naýryzyndaǵy Qarjy mınıstrliginiń Memlekettik múlik jáne jekeshelendirý komıteti men «Nomad’s Land» JShS arasyndaǵy satyp alý-satý shartyn jaramsyz dep taný týraly sotqa talap aryz bergen.

— Sot sheshimimen atalǵan mámile jaramsyz dep tanylyp, nátıjesinde «Tulpar» kesheni memleket menshigine qaıtaryldy, — dep habarlady basqarmadan.

2025 jyldyń 19 tamyzynda Almaty qalasy ákimdiginiń № 3/583 qaýlysymen «Tulpar» kesheni Almaty qalasynyń kommýnaldyq menshigine qabyldanyp, qalalyq sport basqarmasyna qarasty Ulttyq jáne at sporty sport klýbynyń jedel basqarýyna berilgen. Al 26 tamyzda tıisti memlekettik organdar arasynda qabyldaý-berý aktisi rásimdeldi.

— Qazirgi tańda keshenniń zańdy tulǵa retinde tirkelý máselesi qarastyrylyp jatyr. Sebebi burynǵy menshik ıesi nysan boıynsha kepil qujattaryn bankke tapsyrǵan. «Tulpar» keshenin qalanyń menshigine qaıtarý aıaqtalǵannan keıin onyń odan ári paıdalaný jáne damytý baǵyttary qaralady. Bıýdjet múmkindigine qaraı jóndeý jáne jańǵyrtý jumystary júrgizilýi yqtımal, — delingen basqarma jaýabynda.

Vedomstvo keshenniń tıimdi jumysyn qamtamasyz etý úshin nysan senimgerlik basqarýǵa berilýi múmkin ekenin atap ótti.

Eske salaıyq, buǵan deıin Almaty ıppodromynyń aýmaǵynda turǵyn úı kesheni salynatyny týraly aqparat tarady. Oǵan Almaty ákimdigi jaýap berdi.