Almatyda týberkýlezben aýyrǵandar sany azaıdy

ALMATY. KAZINFORM — Almatyda týberkýlezben aýyrǵandar sany men odan bolatyn ólim-jitim kórsetkishi azaıyp keledi.

Bul týraly Almaty qoǵamdyq densaýlyq saqtaý basqarmasynyń shtattan tys bas ftızıatry Janar Sápıeva QDSB basshysy Marat Pashımovtyń jáne qalanyń medıtsınalyq uıymdary ókilderiniń qatysqan kezekti jumys keńesinde málimdedi.

Aýrýshańdyq 15,9% tómendep, 100 myń turǵynǵa shaqqanda 18 jaǵdaı boldy, al 2024 jyldyń osy kezeńinde bul kórsetkish 21,5 bolǵan.

Balalar arasynda da oń ózgerister baıqalady. Balalardaǵy týberkýlezben aýrýshańdyq 2,2% tómendep, 100 myń balaǵa shaqqanda 4,4 jaǵdaı boldy.

Emge beıimdilikti arttyrý maqsatynda ambýlatorııalyq kezeńde týberkýlezben aýyratyn naýqastarǵa jergilikti bıýdjet esebinen áleýmettik qoldaý kórsetiledi. Atap aıtqanda, naýqastarǵa 12 aı boıy aı saıyn 12 aılyq eseptik kórsetkish (AEK) mólsherinde qarjylaı kómek beriledi.

Eske salaıyq, buǵan deıin Qazaqstanda týberkýlezdi emdeý merzimi qysqarǵanyn jazǵanbyz.