Almatyda týberkýlezben aýyratyndar sany 3 ese tómendedi
ALMATY. KAZINFORM — Almatyda týberkýlez boıynsha epıdemıologııalyq jaǵdaı turaqty. Bul týraly óńirlik kommýnıkatsııalar qyzmetinde ótken baspasóz máslıhatynda qalalyq «Ftızıopýlmonologııa ortalyǵynyń» monıtorıng jáne baǵalaý ortalyǵynyń jetekshisi Sáýlesh Áýezova málimdedi.
Spıkerdiń sózinshe, keıingi 10 jylda qalada týberkýlezge shaldyǵý kórsetkishi 60,5%-ǵa, al ólim-jitim deńgeıi 82,7%-ǵa tómendegen.
– Jyl saıyn qalada 484 jańa týberkýlez jaǵdaıy tirkeledi. Aýrý juqtyrǵandardyń 30%-dan astamy qaýip tobyndaǵy adamdar – qant dıabeti, ókpeniń sozylmaly aýrýlary bar naýqastar, uzaq merzimdi gormonaldy terapııa qabyldaıtyndar, AITV juqtyrǵandar, alkogol men esirtkige táýeldi azamattar. Sonymen qatar naýqastardyń shamamen 8 paıyzy belgili bir turǵylyqty jeri joq adamdar, - dep atap ótti Sáýlesh Áýezova.
Aıtýynsha, qalalyq zerthanada týberkýlezdi nebári 1,5-2 saǵat ishinde anyqtaýǵa múmkindik beretin zamanaýı jabdyqtar bar.
– Sondaı-aq Xpert MTB/XDR apparattary ornatylǵan joǵary tehnologııalyq zerthanalar jumys isteıdi, olar týberkýlezge qarsy preparattarǵa tózimdilikti 90 mınýt ishinde anyqtaı alady. Úsh qalalyq emhanada G-Xpert PTR apparattary jumys isteıdi, bul molekýlalyq-genetıkalyq dıagnostıkamen qamtýdy 32,2%-ǵa arttyrdy, - dedi ol.
Jańa preparattardy engizý esebinen dárige tózimdi týberkýlezdi emdeý uzaqtyǵy 18–24 aıdan 6-9 aıǵa deıin qysqardy.
– Almatyda BPaLM rejımi boıynsha «Pretomanıd» preparaty qoldanylatyn pılottyq joba jalǵasyp jatyr. Qazir 91 naýqas osy baǵdarlama aıasynda em qabyldaýda, olardyń 48-i terapııany sátti aıaqtady, - dedi ol .
2024 jyly ambýlatorııalyq em qabyldaıtyn 963 patsıentke 197,8 mln teńge kóleminde kómek kórsetildi. Sonymen qatar patsıentterdiń 57%-y dári-dármekterdi qashyqtan, beınebaqylaý arqyly alady. Áıelder men balalarǵa, qarttar men qozǵalysy shekteýli patsıentterge arnalǵan arnaıy mobıldi toptar dári-dármekterdi úılerine jetkizedi.
Eske salaıyq, byltyr Almatyda balalar arasynda týberkýlez aýrýy kóbeıgen bolatyn.