Almatyda tsıfrlyq tólemmen jumys istegen esirtki taratýshylar ustaldy

ALMATY. KAZINFORM — Almaty polıtsııasynyń qyzmetkerleri jedel-izdestirý is-sharalary barysynda qala aýmaǵynda sıntetıkalyq esirtki zattaryn taratýmen aınalysqan bir top adamnyń zańsyz áreketin áshkereledi. 

Kúdiktiler keshki ýaqytta qolǵa túsken. Tintý kezinde olardan jasyryn qoıyp ketý úshin daıyndalǵan untaq tárizdi zat salynǵan 19 orama tárkilendi.

Sot-saraptamasynyń qorytyndysyna sáıkes, tárkilengen zat azamattardyń ómiri men densaýlyǵyna asa qaýipti sanalatyn sıntetıkalyq esirtki — alfa-PVP ekeni anyqtaldy.

Tergeý barysynda kúdiktilerdiń ınternet arqyly jumys isteıtin esirtki dúkeniniń nusqaýy boıynsha áreket etip, taratýshy rólin atqarǵany belgili boldy.

— Árbir jasyryp qaldyrylǵan orama úshin tólem tsıfrlyq platformalar men elektrondy ámııandar arqyly júrgizilgen. Bul — esirtki bıznesin uıymdastyrýshylar óz izin jasyrý úshin jıi qoldanatyn shema, — dep habarlady vedomstvo.

Polıtsııa ókilderi esirtkiniń zańsyz aınalymyna, tipti kýrer nemese jasyryn qoıyp ketýshi rólinde bolsa da, qatysý aýyr qylmys bolyp esepteletinin jáne qatań jaza bar ekenin eskertti.

Eske salaıyq, buǵan deıin Almatyda túngi klýbtyń aspazy esirtki taratty degen kúdikke ilingenin jazǵanbyz.