Almatyda trolleıbýstar júıesine qatysty ózgeris bola ma
ALMATY. KAZINFORM – Almaty ákimdigi trolleıbýstardy elektrobýstarǵa aýystyrýy múmkin degen aqparatqa qatysty túsinik berdi.
Buǵan deıin áleýmettik jeliler men buqaralyq aqparat quraldarynda qala trolleıbýstardan bas tartyp, olardyń ornyna elektrobýstardy kezeń-kezeńimen engizýi múmkin ekeni týraly aqparat taraǵan edi. Jazbalarda mundaı ózgeris «qalanyń kórkin jaqsartý jáne kóshelerdegi baılanys elektr jelileriniń sanynyń azaıtý maqsatynda jasalyp jatyr» delingen.
Osyǵan baılanysty redaktsııa Almatynyń jol qozǵalysyn uıymdastyrý jáne jolaýshylar kóligi basqarmasyna resmı saýal joldady. Vedomstvonyń málimetinshe, qazirgi ýaqytta trolleıbýstardan bas tartý máselesi qarastyrylyp jatqan joq. Kerisinshe, bul kólik túri qalypty rejımde jumys istep tur: kún saıyn qala kóshelerinde 156 trolleıbýs jolaýshylardy tasymaldaıdy.
Basqarma buǵan qosa qosymsha elektrobýstar satyp alý máselesi de ázirshe qarastyrylyp jatpaǵanyn naqtylady.
Aıta keteıik, Almatyda qoǵamdyq kólikti ekologııalandyrý baǵytyndaǵy jumys jalǵasyp jatyr. Qalada dızeldi avtobýstardy qorshaǵan ortaǵa zııany az kólik túrlerine – elektrobýstar men gazben júretin kólikke kezeń-kezeńimen aýystyrý bastalyp ketken.
Eske salaıyq, 2022 jyly Prezıdent Qasym-Jomart Toqaev qala jurtshylyǵymen kezdesýinde eskirgen ári ekologııalyq talaptarǵa saı kelmeıtin kólik túrlerinen birtindep bas tartý qajet ekenin aıtqan edi. Memleket basshysy qala kóshelerinde dızeldi avtobýstar júrmeýge tıis ekenin, olardyń ornyna gazben jáne elektr qýatymen júretin qoǵamdyq kólikter qatynaýy keregin aıtqan edi.
Buǵan deıin Almatyda 2025 jyldyń sońyna deıin qalalyq qoǵamdyq kóliktiń ekologııalandyrý deńgeıin 100%-ǵa jetkizý josparlanyp otyrǵanyn habarlaǵanbyz. Osy maqsatta 600 gazben júretin avtobýs pen 200 elektrobýsty satyp alýǵa konkýrstar jarııalanǵan.