Almatyda tozyǵy jetken sorǵy stantsııasy jóndeledi
ALMATY. KAZINFORM — Almatyda 32 jyl boıy jóndeý kórmegen sorǵy stantsııasy qaıta qalpyna keltiriledi.
Almaty ákimi Erbolat Dosaev Almaly aýdany Volhovskaıa kóshesinde ornalasqan sýmen jabdyqtaýdyń apattyq jaǵdaıda turǵan sorǵy stantsııasyna bardy. 1987 jyly salynǵan sorǵy stantsııasy 500-den astam turǵyny bar 4 kópqabatty turǵyn úıdi aýyz sýmen qamtamasyz etedi.
32 jyl boıy jóndeý jumystary júrgizilmegen nysan qaıta qalpyna keltiriledi. Negizi sorǵy stantsııasy isten shyqqan.
Qala basshysynyń tapsyrmasy boıynsha sorǵy stantsııasyna tekserý júrgizilip, avarııalyq-qalpyna keltirý jumystarynyń smetalyq quny anyqtaldy. Jumysty osy jyldyń maýsym aıynda bastaý josparda.
Almaty ákimi turǵyndardyń tynys - tirshiligin qamtamasyz etetin obektini rekonstrýktsııalaýdy dereý qolǵa alýdy jáne jumystar aıaqtalǵannan keıin sorǵy stantsııasyn «Almaty Sý» MKK balansyna berýdi, ony qalalyq júıeniń bir bóligine aınaldyrýdy tapsyrdy.
Aıta keteıik, 2023 jyly Almaly aýdanynda osyǵan uqsas taǵy eki apattyq nysan máselesi sheshildi. 26 jyl ishinde alǵash ret Aıtıev kóshesi, 13 mekenjaıdaǵy 26 jyl ishinde jóndeý kórmegen sýmen jabdyqtaý sorǵy stantsııasy tolyǵymen qaıta jańartyldy.
Sondaı-aq «Panorama» sý burý jáne sýmen jabdyqtaý sorǵy stantsııasynda avarııalyq-qalpyna keltirý jumystary júrgizildi. 1600-ge jýyq abonent turaqty jáne sapaly sýmen qamtamasyz etilgen.
