Almatyda tozǵan sý jelilerin jańartýǵa 14,8 mlrd teńge ınvestıtsııa salynady
ALMATY. KAZINFORM – Turǵyndarǵa sýdy úzbeı berip, kommýnaldyq qyzmettiń sapasyn arttyrý úshin «Almaty sý» mekemesi qubyr men káriz júıesin jańalap jatyr. Bul týraly óńirlik kommýnıkatsııalar qyzmetinde ótken baspasóz máslıhatynda kompanııanyń óndiris jónindegi bas dırektorynyń orynbasary Berik Jambylov málim etti.
– 2025 jyly «Almaty Sý» ınjenerlik júıelerdi damytýǵa 14,8 mlrd teńge ınvestıtsııa salýdy josparlap otyr. Eń tozyǵy jetken sý men káriz jelisiniń 50 shaqyrymy aýystyrylady. Jumys kezinde qala turǵyndaryna sý úzbeı berilip, kólik qozǵalysy da toqtamaıdy, - deıdi spıker.
Aıtýynsha, iri jobalar qatarynda Myńbaev kóshesindegi magıstraldi sý qubyryn aýystyrý, Taýsamaly shaǵyn aýdanynda ınjenerlik jeliler júrgizý jáne Tımırıazev kóshesindegi transheıasyz ádispen sý qubyryn qaıta jańartý kózdelgen.
Barlyq qurylys-montajdaý jumysy jylytý maýsymy bastalǵansha bitpek. Injenerlik jeliler tartylǵanan keıin birden jol jamylǵysyn qalpyna keltirýge kirisedi.
– Bıyl 4 sý aıdaý stantsııasy kúrdeli jóndeýden ótip, 200 dana sý aıdaý jabdyǵy, 444 dana japqysh armatýra, 4 transformatorlyq qosalqy stantsııa aýystyrylady, sondaı-aq 2 taza sý rezervýary salynyp, jóndeledi. Sonymen qatar órt gıdranttary, sý uńǵymalary jóndelip, arnaýly tehnıka jańartylady, - dedi ol.
Spıker ınfraqurylymdy qys mezgiline daıarlaý maqsatynda 2025 jyldyń sońyna deıin 700 shaqyrymnan astam qubyr jýylyp, 10 myń órt gıdranty tekserilip, jóndeletinin atap ótti.
Budan bólek, 100 myńnan astam qudyq tazartylyp, 1 200 dana japqysh armatýra jóndelip, aýystyrylady.
Eske salaıyq, buǵan deıin Almatyda bıyl 70 shaqyrym sý qubyry men káriz jelileri aýystyrylatyny týraly jazǵanbyz.