Almatyda tórt túlik maldy tegin vaktsınatsııalaý bastaldy

ALMATY. KAZINFORM – Almatyda epızootııalyq ahýaldy turaqty saqtaý jáne turǵyndardyń densaýlyǵyn qorǵaý maqsatynda jyl saıynǵy veterınarııalyq aldyn alý jáne dıagnostıkalyq sharalar qolǵa alyndy.

Almaty kásipkerlik jáne ınvestıtsııalar basqarmasyna qarasty «Almaty veterınarııalyq qyzmeti» mamandarynyń málimetinshe, 2026 jyldyń alǵashqy toqsanyna arnalǵan josparǵa sáıkes tórt túlik mal asa qaýipti juqpaly aýrýlarǵa qarsy egiledi.

Atap aıtqanda, aýsylǵa qarsy 1 760 bas iri qara, 1 230 bas usaq mal jáne 120 bas shoshqa vaktsınatsııadan ótedi. Sibir jarasynyń aldyn alý úshin 120 shoshqa, 14 túıe jáne 26 bir tuıaqty janýar egiledi. Sonymen qatar emfızematozdy karbýnkýlǵa qarsy 1 120 bas iri qara, al nodýlıarly dermatıtke qarsy 1 420 bas iri qaraǵa vaktsına salý kózdelgen.

– Jospar aıasynda 1 000 bas iri qara men 14 túıege týberkýlezge qarsy allergııalyq tekserý júrgiziledi. Dıagnostıkalyq jumystar barysynda 350 iri qaradan, 150 usaq maldan jáne 200 jylqydan brýtsellezge qarsy qan synamalary alynady, - delingen habarlamada.

Epızootııalyq sharalardyń barlyǵy, onyń ishinde vaktsınatsııa da, zerthanalyq tekserýler de memlekettik tapsyrys aıasynda janýar ıeleri úshin tegin júrgiziledi.

Janýarlardy tekserý, tóldi esepke qoıý, jeke tutyný úshin esepten shyǵarý, derekterdi túzetý jáne vaktsınatsııa men dıagnostıkalyq sharalar týraly aqparatty naqtylaý úshin Tort Tulik mobıldi qosymshasyn júkteý qajet.

Vaktsınatsııa jáne dıagnostıkalyq jumystar boıynsha kelesi aýdandyq veterınarııalyq mamandarǵa habarlasýǵa bolady:

• Alataý aýdany – [phone] (Erkin Arysbekov);

• Áýezov aýdany – [phone] (Sábıt Aıtbaev);

• Bostandyq aýdany – [phone] (Sábıt Mátkárimov);

• Jetisý aýdany – [phone] (Sársenbek Úmbetaev);

• Medeý aýdany – [phone] (Sábıt Myńjasarov);

• Naýryzbaı aýdany – [phone] (Marat Qalıev);

• Túrksib aýdany – [phone] (Jomart Kárimov).

Eske salaıyq, buǵan deıin Alataýda úı janýarlary azyǵyn óndiretin jańa zaýyt ashylatynyn habarlaǵanbyz.