Almatyda tórt sýburqaq keshenin jóndeýge 5,6 mlrd teńge jumsalmaq
ALMATY. KAZINFORM – Almatyda 15 jylda alǵash ret 4 sýburqaq keshenine jóndeý jumystary júrgiziledi. Bul týraly Almaty ákimi Erbolat Dosaevtyń 1-30 sáýir aralyǵyndaǵy QR Prezıdenti Qasym-Jomart Toqaevtyń tapsyrmalaryn oryndaý jónindegi esebinen belgili boldy.
Almaty ákimdiginen atap ótkendeı, osy jyldyń 15 sáýirinde 5,6 mlrd teńgege tórt sýburqaqty jańǵyrtýǵa shart jasaldy.
– Almatyda 15 jylda alǵash ret 4 sýburqaq keshenine – ákimdik ǵımaratynyń Shyǵys jáne Batys jaǵyndaǵy, Respýblıka alańyndaǵy, sondaı-aq Ǵ. Músirepov teatry janyndaǵy sýburqaqtarǵa kúrdeli jóndeý júrgiziletin bolady, – dep habarlady ákimdikten.
Sondaı-aq Almaty ákiminiń esebinde Saıran kólin abattandyrý jáne qoǵamdyq keńistikterdi damytý jónindegi tapsyrmalardyń oryndalý barysy da kórsetilgen.
Qazir Saıran kóliniń aınalasyn abattandyrý jumystary 90% oryndaldy. Munda «Lorberg» (Germanııa) pıtomnıginen ákelingen bıiktigi 6 metrden asatyn 200 iri aǵash, sondaı-aq 3300 buta otyrǵyzyldy.
Qoǵamdyq keńistikti damytý aıasynda Almatyda Nazarbaev dańǵyly men Gandı kóshesiniń qıylysynda bıiktigi 6 metrden asatyn 50 iri aǵash otyrǵyzylǵan jańa skver paıda bolady. Bul ýchaskede rezervýardy daıyndaý jáne ınjenerlik jelilerdi tóseý jumystary júrgizilip jatyr.
Eske salaıyq, Almatydaǵy sýburqaqtar 1 mamyr kúni iske qosyldy.