Almatyda torǵaı men qarlyǵash sany azaıyp ketken — ornıtolog
ALMATY. KAZINFORM — Elimizdegi qustardyń jaǵdaıy qandaı? Bul suraqqa ornıtolog, Qazaqstan bıoalýantúrlilikti saqtaý qaýymdastyǵynyń ǵylym jónindegi dırektory Sergeı Sklıarenko jaýap berdi.
Onyń aıtýynsha, Qazaqstanda 520-dan astam qus túri tirkelgen, olardyń shamamen 400-i uıa salady. Biraq maman qustar álemi qaýip-qaterge tap bolyp otyrǵanyn jasyrmady.
— Negizgi qaýiptiń qatarynda ınfraqurylymnyń damýy men paıdaly qazbany óndirýge baılanysty tabıǵı meken etý ortasynyń joıylýy, qorshaǵan ortanyń lastanyp, klımattyń ózgerýi, sondaı-aq zańsyz saýda men brakonerlik bar. Álemde qustyń túri shamamen 49% azaıyp, alańdatarlyq úrdis baıqalǵan. Qazaqstanda qazir Qyzyl kitapqa 58 túr engizilgen, bul tizim aldaǵy ýaqytta áli de tolyǵýy múmkin, — dedi Sergeı Sklıarenko.
Ornıtolog jekelegen túrlerdiń jaǵdaıy erekshe alańdaýshylyq týǵyzatynyn aıtty. Onyń sózinshe, zańsyz saýdanyń kesirinen ıtelginiń sany shamamen 90%-ǵa qysqarǵan. Dala qyrany, sulý tyrna men jorǵa dýadaq jıi elektr jelisine túsedi eken.
— Dıklofenak sııaqty veterınarlyq preparattarmen ýlaný da óleksemen qorektenetin qustardyń sanyna úlken qaýip tóndirip otyr. Almatyda torǵaı men qarlyǵash sııaqty úırenshikti qustardyń sany azaıa bastaǵan. Qalalyq orta ózgerip, jándikterdiń sany azaıǵandyqtan osyndaı jaǵdaıǵa alyp kelgen. Sý mańyndaǵy qustardyń sany, kerisinshe, artyp otyr, óıtkeni qaladaǵy sý aıdyndarynda olarǵa tıispeıdi, — dep túsindirdi ol.
Maman ornıfaýnany qoldaý úshin qalalyq saıabaqtarda tabıǵı ortany saqtap, jıdek egip, aýmaqtardy hımııalyq óńdeýdi azaıtyp, qustardy sý kózimen qamtamasyz etýdi usyndy.
Eske salaıyq, Almaty saıabaqtarynyń birine Qytaıda mekendeıtin qaz ushyp keldi.
