Almatyda Tóle bı jáne Jubanov kósheleriniń jańa bóligi qashan ashylady
ALMATY. KAZINFORM – Almatyda Tóle bı jáne Jubanov kóshelerin uzartý jumystary júrgizilip jatyr.
Naýryzbaı aýdanynyń ákimi Nazıra Toǵyzbaevanyń aıtýynsha, Tóle bı kóshesin Áshimov kóshesinen qala shekarasyna deıin uzartý jobasynyń jalpy uzyndyǵy 2,3 km. Qazirgi tańda nysannyń qurylys daıyndyǵy 70%-ǵa jetip, 1,9 shaqyrym jolǵa asfalt tóselgen. Jumystardy 2026 jyldyń qarasha aıynda aıaqtaý josparlanyp otyr.
Al Jubanov kóshesin Momyshuly kóshesinen Alataý dańǵylyna deıin uzartý jobasynyń uzyndyǵy 1,2 shaqyrym. Nysannyń daıyndyq deńgeıi 68%-ǵa jetken.
- Qazirgi ýaqytta ınjenerlik jelilerdi qaıta qurý jáne jol konstrýktsııasyn ornatý jumystary júrgizilip jatyr. Qurylysty 2027 jyldyń jeltoqsan aıynda aıaqtaý josparlanǵan, - dedi aýdan ákimi.
Buǵan deıin Almaty ákimdigi Abaı dańǵyly men Saın kóshesin Úlken Almaty avtomobıl aınalma jolyna deıin uzartý jumystarynyń barysy týraly habarlady. Ákimdik málimetinshe, bul eki baǵytta satyp alynǵan jer telimderin bosatý, ınjenerlik kommýnıkatsııalardy kóshirý jáne jol tóseminiń negizin salý jumystary jalǵasyp jatyr. Atalǵan kóshelerdiń uzartylǵan bóliginde jyl sońyna deıin kólik qozǵalysy ashylýy tıis.
Eske salaıyq, Almatyda aldaǵy jyldary 5 kóshe Úlken Almaty aınalma jolyna deıin uzartylmaq.
