Almatyda Tóle bı kóshesin uzartý jumystary nege toqtap tur – ákim jaýap berdi

ALMATY. KAZINFORM – Almaty qalasynyń ákimi Erbolat Dosaev Áýezov aýdanynyń turǵyndarymen kezdesý ótkizdi. Jıyn barysynda qala turǵyny Tóle bı kóshesin uzartý jumystary týraly suraq qoıdy.

– Tóle bı kóshesin uzartý jobasy 2 jyl buryn bastaldy. Sol kezden beri biz qurylystyń arasynda ómir súrip kelemiz. Kópjyldyq qaraǵaılar shabyldy, aryq júıesi kómilip qaldy. Endi jarty jyldan beri barlyq jumystar múldem toqtap qaldy. Onyń sebebi nede? - dedi Áýezov aýdanynyń turǵyny.

Almaty ákimi bul suraqtaǵy basty másele – jer ýchaskelerin satyp alý ekenin atap ótti.

– Jumys boıynsha merdiger kompanııa belgilengen, jergilikti bıýdjette qarajat bar. Biraq basty másele - jer ýchaskelerin satyp alý. Barlyǵy 160 aýmaqty satyp alýymyz kerek edi. Onyń 140-yn alyp qoıdyq. Endi qalǵan jıyrmasynyń bireýimen kelisim jasasyp jatyrmyz, jeteýimen is sotta. Al qalǵan on ekisimen sóılesip jatyrmyz. Meniń tájirıbemde jer ıelerimen biz usynǵan baǵa boıynsha kelisken jaǵdaı bolǵan emes. Sondyqtan sot protsessterinen ótýge májbúrmiz. Qyrkúıek-qazan aılaryna qaraı barlyq sot daýlaryn aıaqtap, qalǵan jer ýchaskelerin satyp alýǵa tyrysamyz, - dedi Erbolat Dosaev.