Almatyda Tóle bı kóshesin uzartý úshin 270 jer teliminiń 211-i satyp alyndy
ALMATY. KAZINFORM — Almatynyń Naýryzbaı aýdany kólik ınfraqurylymyn jańǵyrtyp jatyr.
Naýryzbaı aýdany ákimi Nazıra Toǵyzbaevanyń aıtýynsha, aýdanda basqa qalalyq jáne oblystyq aımaqtarmen kólik baılanysyn jaqsartý úshin úlken joldar salýdy qolǵa alynǵan.
Atap aıtqanda, qazirgi ýaqytta Tóle bı men Jubanov kóshelerin uzartý úshin jer ýchaskelerin satyp alý jumysy júrip jatyr. Tóle bı dańǵylynda 270 ýchaskeden 211-i satyp alynǵan. Qalǵan ýchaskeler 2025 jylǵa deıin satyp alynyp, barlyq qurylys-montajdaý jumystary aıaqtalady. Bul jobany iske asyrý úshin 19,2 mıllıard teńge bólingen.
Al Jubanov kóshesinde 346 ýchaskeniń 75-i satyp alynǵan, qalǵanynda baǵalaý jumystar júrip jatyr. Bul jobaǵa 13,1 mlrd teńge bólindi, ony aıaqtaý 2026 jyldyń qarasha aıyna josparlanǵan.
Odan bólek Nazıra Toǵyzbaeva byltyr aýdanda 21 kósheniń 15 shaqyrym jolyn ortasha jóndeýge 1,1 mlrd teńge jumsalǵanyn atap ótti. 2025 jyly taǵy 35 kóshede 47 shaqyrym jol jańartylady, ol úshin 3,2 mlrd teńge bólindi.
Eske salaıyq, buǵan deıin Abaı dańǵylyn Úlken Almaty aınalma avtomobıl jolyna deıin uzartý qandaı satyda ekenin jazǵanbyz.