Almatyda tolassyz jańbyrdan keıin jaqynda jóndelgen joldar zaqymdandy
ALMATY. KAZINFORM – Almatylyqtar eki kúnge jýyq jaýǵan jaýyn-shashynnan keıin qalada zaqymdanǵan joldardyń sýretterin jelide jarııalap jatyr.
Máselen, qala turǵyny Tımırıazev kóshesi boıynda Esentaı ózeninen ótetin kópirdiń jaǵdaıyn kórsetti. Jarııalanymnan kópirdiń bir bóliginde tósemtastardyń qırap qalǵany baıqalady.
Jazbaǵa pikir bildirgen ózge adamdar osyǵan uqsas jaǵdaılarmen bólisti. Taǵy bir jeli qoldanýshysy Ǵabdýllın kóshesindegi jaıaý júrginshiler jolynda ortasynan opyrylyp qalǵan tósemtastardyń sýretin jarııalady.
Jelidegi ózge jazbada ál-Farabı dańǵyly men Nazarbaev kósheleriniń qıylysynda zaqymdanǵan trotýar kórsetildi.
Turǵyndardyń biri Alataý aýdany, Samarqand kóshesine baılanysty shaǵym bildirdi. Onyń aıtýynsha, qyrkúıekten beri jol birneshe ret qazylyp, qazir jumystar toqtap qalǵan. Sonyń kesirinen jańbyr kezinde kóshe kólik júre almaıtyn batpaqqa aınalǵan.
Bul jaǵdaıǵa Alataý aýdanynyń ákimdigi túsinikteme berdi. Resmı jaýapqa sáıkes, munda ınjenerlik jelilerdi salý boıynsha qurylys jumystary bastalǵan. Ony 2027 jyldyń naýryzynda aıaqtaý josparlanyp otyr.
- Qazirgi ýaqytta ınertti materıaldardy qoldana otyryp, topyraq tóseý jáne jol jabynyn tegisteý jumystary júrgizilip jatyr. Kórsetilgen ýchaskelerde arnaıy tehnıka jumyldyrylyp, anyqtalǵan kemshilikterdi jedel joıý úshin jumys brıgadalarynyń kezekshiligi uıymdastyryldy, - dep habarlady aýdan ákimdiginen.
Jaýyn-shashyn saldarynan Jarokov jáne Myńbaev kósheleriniń qıylysyndaǵy jańadan salynǵan tósemtastar da buzylǵan. Tıisti sýret áleýmettik jelide tarady.
Vera Davıdova esimdi turǵyn Dostyq kóshesinde birneshe tustan synǵan tósemtastarǵa shaǵym bildirdi.
Jelide jarııalanǵan bul joldardyń kópshiligi “qasbetten qasbetke deıin” qaǵıdaty boıynsha jaqynda jóndelip, abattandyrylǵan ári jańa tósemtastar salynǵan.
Eske salaıyq, keshe almalyqtar sý basqan kósheler men metro beketine shaǵymdanǵan bolatyn. Sondaı-aq birneshe kóshede asfalt buzylyp, kólikter shuńqyrǵa batyp qalǵan. Aýdan ákimdikteri mundaı ýchaskeler aýa raıy jaqsarǵan soń, merdiger uıymdardyń kúshimen qalpyna keltiretinin málimdedi.
Almaty ákimdigi eki kúnde aılyq jaýyn-shashyn mólsheriniń 76%-y jaýǵanyn habarlady. Qolaısyz aýa raıynyń saldaryn aldyn alý jáne joıý maqsatynda jalpy sany 1 579 adamnan turatyn 85 jedel brıgadanyń kezekshiligi uıymdastyryldy.
