Almatyda TMD aýmaǵyndaǵy alǵashqy Ǵylym mýzeıiniń qurylysy qashan bastalady
ALMATY. KAZINFORM – «Almaly» saýda ortalyǵy 2023 jyly memleketke berildi.
Byltyr jeltoqsan aıynda qalalyq máslıhattyń kezekten tys HHV sessııasynda Almaty ákimi Erbolat Dosaev Qaırat Boranbaevqa tıesili bolǵan «Almaly» saýda ortalyǵynda balalarǵa arnalǵan Ǵylym mýzeıi ashylatynyn aıtty.
– Memleket basshysynyń qoldaýyn eskere otyryp, 2025 jyldan bastap Almatyda burynǵy «Almaly» saýda ortalyǵynyń bazasynda Science Museum Singapore-pen birlesip, balalarǵa arnalǵan TMD-daǵy alǵashqy Ǵylym mýzeıin qurý jumystary bastalady. Bul maqsatqa qala bıýdjetinen 12,2 mlrd.teńge bólý josparlanǵan, - dedi Erbolat Dosaev.
Osy oraıda, «Kazinform» agenttigi Almaty ákimdigine jańa nysanǵa baılanysty saýal joldady. Shahar basshylyǵynyń jaýabyna sáıkes, qazirgi ýaqytta Ǵylym mýzeıiniń jobalaý-smetalyq qujattamasy ázirlenip jatyr.
– 2024 jyldyń qazan aıynda Sıngapýr Respýblıkasynyń «KINGSMEN EXHIBITS PTE LTD» kompanııasy men Almaty qalasy qoǵamdyq keńistikti damytý basqarmasy arasynda «Almaty qalasynda balalarǵa arnalǵan ǵylym murajaıyn qurý» jobasy boıynsha kelisimshartqa qol qoıyldy. Bekitilgen kelisimshartqa sáıkes, merdiger kompanııa — «KINGSMEN EXHIBITS PTE LTD» kompanııasy. Jobalaý-smetalyq qujattama ázirlengennen keıin qurylys jumystary bastalady, - dep habarlady ákimdikten.
Murajaıdyń ashylýy 2026 jyldyń ekinshi toqsanyna josparlanǵan. Joba aıasynda murajaı aýmaǵynda turaqty jáne ýaqytsha ekspozıtsııalar qurylady. Turaqty ekspozıtsııalarǵa oıyn alańdary bar «KIDSSTOP» sııaqty aımaqtar kiredi. Olar: «Jibek jolyndaǵy ǵylym» aımaǵy, ınjenerııa, jer týraly ǵylym jáne bıomedıtsınalyq ǵylymdary boıynsha «Ónertabys jáne ınnovatsııalar» aımaǵy, astronomııa men ǵaryshkerlikke baǵyttalǵan «Ǵarysh stantsııasy» aımaǵy. Ýaqytsha ekspozıtsııalarǵa ǵylymı shoýlarǵa arnalǵan galereıalar men zaldar, sondaı-aq zerthanalar men synyptar kiredi.
Sonymen qatar Almaty ákimdigi jańa mýzeı boıynsha Science Museum Singapore mekemesimen qandaı baılanys bar ekenin túsindirdi.
— Ǵylym mýzeıin júrgizý jáne basqarý maqsatynda murajaı mamandaryn Sıngapýr qalasyna oqytýǵa jiberý jáne Sıngapýr mamandarynyń Qazaqstanǵa tájirıbemen bólisýge kelýi maqsatynda «Global Pte Ltd”-dan satyp alynǵan zııatkerlik franshıza aıasynda jumystar júrgizilip jatyr, - delingen ákimdik jaýabynda.
Eske salaıyq, buǵan deıin memleketke qaıtarylǵan «Almaty arena» men «Halyq arenada» qandaı ózgeris bolatynyn jazǵanbyz.