Almatyda Tilendıev kóshesin uzartýǵa alynatyn jer telimderiniń tizimi ulǵaıdy
ALMATY. KAZINFORM — Almatyda memleket muqtajy úshin taǵy ondaǵan jer ýchaskesi májbúrli túrde alynady.
Almaty qalasy ákimdiginiń 2026 jylǵy 17 shildedegi № 3/405-1075 qaýlysyna sáıkes, kárizdik sorǵy stantsııasynyń qurylysy úshin Túrksib aýdanynda ornalasqan 3 jer ýchaskesi memleket muqtajyna alynady. Májbúrlep ıelikten shyǵarý merzimi 2028 jyldyń 31 jeltoqsanyna deıin belgilengen.
Odan bólek Almaty qalasy ákimdiginiń 2026 jylǵy 17 shildedegi № 3/405-1077 qaýlysy boıynsha Tilendıev kóshesin uzartýǵa Alataý aýdanynda Rysqulov dańǵylynan qala shekarasyna deıin ornalasqan 10 jer telimi satyp alynady. Májbúrlep ıelikten shyǵarý merzimi — 2028 jyldyń 31 jeltoqsany. Qalalyq jer qatynastary basqarmasy jer ýchaskeleriniń menshik ıelerine ótemaqy tóleýdi qamtamasyz etedi.
Almaty qalasy ákimdiginiń 2026 jylǵy 17 shildedegi № 3/405-1078 qaýlysyna sáıkes, avtobýs parkiniń qurylysy úshin «BrightHorizon Capital» JShS-nyń Túrksib aýdany Spassk kóshesinde ornalasqan 9 ga jer ýchaskesi májbúrli túrde alynbaq. Keıin bul ýchaske jol qozǵalysy jáne jolaýshylar kóligin uıymdastyrý basqarmasynyń teńgerimine beriledi.
Eske salaıyq, buǵan deıin Almatyda Tilendıev kóshesin uzartý úshin 92 jer ýchaskesi satyp alynatynyn jazǵanbyz.
