Almatyda Tilendıev kóshesin uzartý jobasy tóńireginde daý shyqty
ALMATY. KAZINFORM – Alataý aýdanynyń turǵyndary Tilendıev kóshesin uzartý úshin memleket muqtajyna satyp alynatyn jer telimderiniń baǵalaý qunyna kelispeı, ótemaqy boıynsha narazylyq bildirdi.
Turǵyndardyń shaǵymy boıynsha Almaty ákiminiń orynbasary Beıbit Shahanov halyqpen kezdesý ótkizip, jaǵdaıǵa qatysty túsinik berdi.
– Qala qarqyndy damyp keledi. Mektep, emhana, sport jáne mádenıet ortalyǵy, sondaı-aq kólik ınfraqurylymyn keńeıtý, jańa metro beketterin salý, magıstraldyq kóshelerdi uzartý sekildi ınfraqurylymdyq jobalardyń qajettiligi artyp otyr. Osy jobalardy júzege asyrý úshin burynnan qalyptasqan aýdandar men jeke qurylys basym aýmaqtardy qaıta uıymdastyrý qajet. Sol sebepti jer telimderin satyp alýǵa májbúrmiz. Bul táýelsiz baǵalaý negizinde naryq quny boıynsha júrgiziledi, ákimdik baǵalaý nátıjesine yqpal ete almaıdy, - dedi Beıbit Shahanov.
Kezdesýge barǵan Ójet shaǵynaýdanynyń turǵyndary múliktiń baǵalaý qunynmen kelispeıtinin aıtty. Sonymen birge kópshiliginiń jer telimderi men qurylys nysandaryna qatysty quqyq belgileıtin qujaty joq.
– Búginde shamamen 30 menshik ıesinde jer men turǵyn úıge qatysty qujat rásimdeýge baılanysty qıyndyqtar bar. Salaǵa jaýapty basqarmalar árbir jaǵdaıdy jeke qarastyryp, qajetti túsindirý jumystaryn júrgizýi, al qajet bolǵan jaǵdaıda qoldanystaǵy zańnama aıasynda múlikti zańdastyrýǵa járdem kórsetýge tıis, - dedi ákimniń orynbasary.
Aıta keteıik, Almatynyń 2040 jylǵa deıingi Bas jospary aıasynda kólik qatynasynyń qoljetimdiligin arttyrý jáne jol-kóshe jelisin jetildirý maqsatynda Tilendıev kóshesin Rysqulov dańǵylynan qala shekarasyna deıin uzartý qarastyrylǵan.
Tilendıev kóshesin uzartý jobasy eki kezeńge bólingen:
Birinshi kezeń – Rysqulov dańǵylynan Sabataev kóshesine deıin, uzyndyǵy – 5,8 shaqyrym. Munda 123 jer telimin satyp alý kózdelgen.
Ekinshi kezeń – Sabataev kóshesinen qala shekarasyna deıin, uzyndyǵy – 4,9 shaqyrym. Bul kezeńde 344 jer telimi satyp alynýǵa tıis.
Ákimdiktiń málimetinshe, búginde 70 jer telimi satyp alynǵan.
– Memleket qajetine jer telimderi zańnamaǵa sáıkes naryq quny boıynsha satyp alynady. Baǵalaý menshik quqyǵy qalaı paıda bolǵanyna, qujattyń tolyq bolýyna nemese bolmaýyna baılanysty emes, ıaǵnı baǵalaý barlyq jaǵdaıda naryq qunyna negizdeledi, - delingen habarlamada.
Eske salaıyq, buǵan deıin Almatynyń jer qatynastary basqarmasy Kazinform agenttiginiń saýalyna bergen jaýabynda 2025 jyldyń basynan beri memleket muqtajy úshin 799 jer ýchaskesi men jyljymaıtyn múlik nysandary satyp alynǵanyn habarlaǵan edi.