Almatyda Tilendıev kóshesin uzartý úshin 92 jer ýchaskesi satyp alynady
ALMATY. KAZINFORM — Almatyda Tilendıev kóshesin qala shekarasyna deıin uzartý josparlanyp otyr.
Almaty qalasy ákimdiginiń 2026 jyldyń 26 aqpanyndaǵy № 1/1-219 qaýlysyna sáıkes, Tilendıev kóshesin Rysqulov dańǵylynan qala shekarasyna deıin uzartý úshin Alataý aýdanynda ornalasqan 92 jer ýchaskesi memleket muqtajyna alynady. Májbúrlep ıelikten shyǵarý merzimi 2028 jyldyń 31 jeltoqsanyna deıin belgilengen.
Almaty qalasynyń jer qatynastary basqarmasy zańnamamen belgilengen tártipte jer telimderiniń ıelerine ótemaqy tóleıdi. Ýchaskeler satyp alynǵannan keıin Almaty qalasy jol ınfraqurylymyn damytý basqarmasynyń teńgerimine beriledi.
Buǵan deıin Alataý aýdanynyń turǵyndary Tilendıev kóshesin uzartý úshin memleket muqtajyna satyp alynatyn jer telimderiniń baǵalaý qunyna kelispeı, ótemaqy boıynsha narazylyq bildirdi. Turǵyndardyń shaǵymy boıynsha Almaty ákiminiń orynbasary Beıbit Shahanov halyqpen kezdesý ótkizip, jaǵdaıǵa qatysty túsinik berdi.
Eske salaıyq, Almatyda qalalyq máslıhat sheshimimen 2026 jyly magıstraldy kóshelerdi uzartýǵa 8 mlrd teńge bólindi.
Bıyl qańtar aıynda Almatyda Raıymbek dańǵylyn Shyǵys aınalma jolyna deıin uzartý úshin 54 ýchaske alynatyny belgili boldy.