Almatyda Terreńqur aımaǵyn jańǵyrtý jumystary aıaqtaldy
ALMATY. KAZINFORM — Almatylyqtardyń súıikti oryndarynyń biri — Terreńqur aımaǵynda jóndeý jumystary aıaqtaldy.
Medeý aýdany ákimdiginiń málimetinshe, Kereı-Jánibek handar kóshesi, 310 mekenjaıyndaǵy Terreńqur-2 saıabaq aımaǵynyń qaıta jańǵyrtý jumystary tolyǵymen oryndaldy. Buryn bul jerde sýy tartylǵan toǵan men qaraýsyz qalǵan aýmaq bolǵan.
— 2023 jyly toǵan jáne oǵan irgeles aýmaq kommýnaldyq menshikke qaıtaryldy. Sol jyly qaıta jańǵyrtý jobasy ázirlenip, 2024 jyly qurylys jumystary bastaldy. Bul Esentaı ózeni boıyndaǵy jáne Terrenqur baǵyty boıyndaǵy eki tanymal jaıaý júrginshiler baǵytyn biriktirýge múmkindik berdi, — dep habarlady aýdan ákimdigi.
Medeý aýdanynyń ákimdigi 4 gektardan astam aýmaqta zamanaýı saıabaq qurylǵanyn atap ótti.
— Jaǵalaýy bar toǵan qaıta qalpyna keltirildi, balalar alańdary, serýen joldary, sport jáne demalys aımaqtary jasaldy. Jańa jaryqtandyrý ornatylyp, kógaldandyrý júrgizildi. Nátıjesinde bul aýmaq táýlik boıy jaıly da qaýipsiz ýaqyt ótkizýge bolatyn orynǵa aınaldy, — dep habarlady ákimdikten.
Eske salaıyq, alǵashqy jospar boıynsha Almatyda Terreńqurdy modernızatsııalaý osy jyldyń sáýir aıynda aıaqtalýy qajet edi.