Almatyda terezeden oq atqan 23 jastaǵy jigit ustaldy

Almatyda kópqabatty úıdiń terezesinen oq atqan er adam ustaldy. Bul týraly Polıtsııa departamenti málim etti, dep habarlaıdy Kazinform.

«Almaty krımınaldyq polıtsııasynyń qyzmetkerleri áleýmettik jelidegi dabyl boıynsha jedel áreket etý aıasynda Atyraý oblysynyń turǵyny, 2000 jyly týǵan H. esimdi azamatty anyqtady jáne ustady. Ol turǵyn úı keshenderiniń biriniń balkonynan, anyqtalmaǵan tapanshadan aspanǵa eki ret oq atqan. Odan úsh patrony bar «RETAY PT24» sıgnaldyq tapanshasy tárkilendi», - dep habarlady departamentten. 

Vedomstvo ókilderi Bostandyq aýdandyq polıtsııa basqarmasynyń qyzmetkerlerimen ustalǵan adamnyń áreketine quqyqtyq baǵa beriletinin atap ótti.

Aıta keteıik, buǵan deıin áleýmettik jelide tapanshany oqtap, aspanǵa qaraı oq atqan er adamnyń vıdeosy taraǵan bolatyn.