Elimizde bıyl 1 myńnan astam jer silkinisi tirkeldi
ASTANA. KAZINFORM — Vıtse-premer Qanat Bozymbaev Almatyǵa jumys sapary barysynda azamattyq qorǵaý nysandaryn aralap, seısmıkalyq qaýipsizdik júıeleriniń jumysymen tanysty. Sapar qorytyndysy boıynsha ǵımarattardyń tózimdiligin tekserý, jer silkinisi týraly erte habarlaý júıesin jetildirý jáne qaýipti aımaqtarda qurylys salýǵa baqylaýdy kúsheıtý jóninde tapsyrmalar berdi.
Qanat Bozymbaev Tótenshe jaǵdaılar mınıstrliginiń «Alataý» jedel maqsattaǵy Ońtústik bazasynda bolyp, qutqarý bólimsheleri men № 21 mamandandyrylǵan órt sóndirý bóliminiń tótenshe jaǵdaılarǵa daıyndyǵyn tekserdi.
Vıtse-premer kelesi jyly barlyq kúshter men quraldardy jumyldyryp, aýqymdy komandalyq-shtabtyq oqý-jattyǵýlar ótkizýdi tapsyrdy.
— Bólimshelerdiń naqty jasaqtalýyn jáne tótenshe jaǵdaılarǵa den qoıýǵa daıyndyǵyn tek qaǵaz júzinde emes, is júzinde tekserý mańyzdy, — dedi ol.
Sondaı-aq «Medeý» seısmologııalyq stantsııasynda jer silkinisterin baqylaý jabdyqtary men erte habarlaý júıesiniń jumysymen tanysty. Seısmologııalyq baıqaý jáne zertteýler ulttyq ǵylymı ortalyǵynda qazaqstandyq-qytaılyq birlesken ortalyq qurý jospary talqylandy. Ol ǵylymı zertteýler júrgizýge, seısmologııalyq derekter almasýǵa jáne erte eskertý júıelerin jetildirýge baǵyttalady.
Almatynyń Tótenshe jaǵdaılar departamentinde azamattyq qorǵaý kúshteriniń daıyndyǵy qaraldy. Vıtse-premer 103,6 myńnan astam ótinish qabyldaǵan 109 biryńǵaı baılanys ortalyǵynyń jumysyn kórip, zardap shekken turǵyndardy qabyldaý pýnktimen tanysty. Qalada mundaı 384 pýnkt bar, onyń 150-i mobıldi qoımalarmen jabdyqtalǵan.
Keıin Almaty ákimdiginde seısmıkalyq qaýipsizdik máseleleri boıynsha keńes ótti. Oǵan qala ákimi Darhan Satybaldy men salalyq mınıstrlikterdiń ókilderi qatysty.
Keńeste Qazaqstan aýmaǵynyń shamamen 40%-y seısmıkalyq qaýipti aımaqtarǵa jatatyny aıtyldy. Jyl basynan beri 1 myńnan astam jer silkinisi tirkelgen, onyń segizi 2–4 ball deńgeıinde sezilgen.
— Seısmıkalyq qaýipti boljaý máselesinde zamanaýı tásilder qajet. Bul jumysqa tsıfrlyq quraldardy belsendi túrde engizý kerek, — dep atap ótti Qanat Bozymbaev.
Vıtse-premer ǵımarattardyń seısmıkalyq tózimdiligin baqylaýdy kúsheıtýdi, seısmıkalyq qaýipti óńirlerdegi nysandardy tekserýdi jáne qaýip-qaterlerdiń tsıfrlyq derekqoryn qalyptastyrýdy tapsyrdy. Sonymen qatar tektonıkalyq jarylymdar men taý bókterindegi aýdandarda qurylys salýǵa tyıym salý qajettigin atap ótti.
Tótenshe jaǵdaılar mınıstrligine seısmologııalyq monıtorıng júıesin jetildirý, Mass Alert júıesin engizýdi aıaqtaý jáne halyqtyń jer silkinisine daıyndyǵyn arttyrý mindetteldi.
Budan bólek, Túrkistan, Mańǵystaý oblystary men Taraz qalasynyń seısmıkalyq aýdandastyrý kartalaryn ázirleýdi qarjylandyrý máselesin pysyqtaý, sondaı-aq qazaqstandyq-qytaılyq zertteý ortalyǵyn qurý jumysyn jandandyrý tapsyryldy.
Eske salaıyq, buǵan deıin Almatyda tótenshe jaǵdaıǵa daıyndyq qaǵaz júzinde emes, is júzinde tekseriletinin jazǵanbyz.
