Almatyda tegin onkologııalyq dári taýsylǵan: qosymsha qarjy bólindi

ALMATY. KAZINFORM – Almatyda onkologııalyq aýrýǵa shaldyqqan azamattar memleketten jeńildetilgen baǵdarlama arqyly alatyn dári – «Tagrıssonyń» jetispeı jatqanyn aıtty.

Almatynyń qoǵamdyq densaýlyq saqtaý basqarmasy bul derekti rastady jáne preparattyń ýaqytsha bolmaýyn eldiń basqa óńirlerinen kelgen naýqastardyń qaıta tirkelýi saldarynan satyp alý kóleminiń boljamnan artyp ketýimen túsindirdi.

- Jyl saıyn Almaty onkologııalyq ortalyǵynda elimizdiń barlyq óńirlerinen joǵary sapaly medıtsınalyq kómek pen dárilik qamtamasyz etý maqsatynda 1000-nan astam naýqas tirkeledi. Preparattyń quny 2 mıllıon teńgeden asady. «Tagrısso» belgili bir sanattaǵy naýqastarǵa tegin nemese jeńildetilgen sharttarmen beriletin dári-dármekter tizimine kiredi. Onyń satyp alynýy men jetkizilýin biryńǵaı dıstrıbıýtor – «SK-Farmatsııa» JShS júzege asyrady. 2025 jylǵa QR Densaýlyq saqtaý mınıstrligi tarapynan Almaty onkologııa ortalyǵyna 8400 tabletka kóleminde lımıt bólingen bolatyn, qazirgi ýaqytta bul kólem tolyqtaı paıdalanyldy. Eldiń basqa óńirlerinen jańa naýqastardyń kelýine baılanysty dári-dármektiń boljanǵan kólemi jetkiliksiz bolyp shyqty, – dep habarlady basqarmadan.

«SK-Farmatsııa» JShS-niń málimetinshe, jetkizýshimen dárini merziminen buryn jetkizý týraly kelissózder júrgizilgen. Nátıjesinde bıyl 26 qyrkúıekke deıin jetkizýshi qosymsha dári-dármekti jóneltpek. Preparat Biryńǵaı dıstrıbıýtordyń qoımasyna túskennen keıin medıtsınalyq uıymǵa jedel túrde jetkizilip, naýqastarǵa beriletin bolady.

- «SK-Farmatsııa» JShS tarapynan dárilik qamtamasyz etý bólingen qarjy sheginde júzege asyrylady. Belgilengen lımıtten asatyn qosymsha qajettilik ýákiletti organmen kelisilgen jaǵdaıda qamtamasyz etiledi, – dep habarlady qoǵamdyq densaýlyq saqtaý basqarmasy.

Eske salaıyq, Ulttyq onkologııa ortalyǵy súıek kemigin transplantattaý sanyn jylyna 180-ge deıin jetkizbek.