Almatyda taýly aımaqtarǵa qyzmet kórsetetin jańa órt sóndirý bólimi ashyldy
ASTANA. KAZINFORM — Úlken Almaty shatqalynda taýly aımaqtaǵy tótenshe jaǵdaılarǵa jedel áreket etýge arnalǵan № 22 mamandandyrylǵan órt sóndirý bólimi paıdalanýǵa berildi, dep habarlaıdy TJM baspasóz qyzmeti.
Jańa nysan Almatynyń ońtústik bóligindegi týrıstik marshrýttar men taýly ınfraqurylym qaýipsizdigin edáýir kúsheıtedi.
Ashylý rásimine QR Tótenshe jaǵdaılar mınıstri general-leıtenant Shyńǵys Árinov, Almaty qalasy ákiminiń birinshi orynbasary Almashan Smatlaev, bólimshelerdiń jeke quramy jáne qyzmet ardagerleri qatysty.
Órt sóndirý bóliminiń tikeleı taýly aımaqta ornalasýy týrısterdiń, alpınıster men demalýshylardyń qatysýymen bolatyn tótenshe jaǵdaılarǵa jedel áreket etý ýaqytyn edáýir qysqartyp, jetýi qıyn aımaqtardaǵy qutqarý operatsııalarynyń tıimdiligin de arttyrady.
Bólimsheniń ǵımaraty eki qabatty, kezekshi aýysym úshin zamanaýı ákimshilik-turmystyq blokpen jaraqtalǵan. Infraqurylymǵa oqý synyby, medıtsınalyq kabınet, demalys jáne tamaqtaný úı-jaılary, sondaı-aq sanıtarlyq-turmystyq aımaqtar kiredi.
Bólimniń quramyna jeke quramnyń turýy úshin bólek apartament ǵımaraty da kiredi. Apartamentter qutqarýshylar men olardyń otbasy músheleri úshin turýǵa arnalǵan yńǵaıly jıhaz jáne turmystyq tehnıkamen jabdyqtalǵan, al irgeles aýmaǵynda balalar oıyn alańy salynǵan.
Qyzmetkerlerdiń dene daıarlyǵyn joǵary deńgeıde ustaýy úshin keshen aýmaǵynda kásibı sport zaly bar «Batyr Team» jattyǵý ortalyǵy jumys isteıdi, sondaı-aq vorkaýt alańy men demalys aımaqtary jasaqtalǵan.
Saltanatty rásim barysynda Shyńǵys Árinov bólimshege jańa tehnıkanyń kiltin tabys etti, oǵan órt sóndirý avtotsısternalary, jedel-qutqarý kólikteri, kvadrotsıklder jáne avtotirkeme kiredi. Medıtsına qyzmetkerleri men qutqarýshylarǵa qyzmettik páterlerdiń kiltteri de tabys etildi.
Bólimsheniń ıeliginde alty birlik tehnıka bar: úsh órt sóndirý avtotsısternasy, evakýator, jedel avtomobıl jáne taýly, jetýi qıyn aımaqtarda jumys isteýge arnalǵan kvadrotsıkl.
— Jańa órt sóndirý bólimi Almaty qalasy Bostandyq aýdanynyń ońtústik bóligin, onyń ishinde Alataý, Mıras, Ǵalamat jáne Arhat yqsham aýdandaryn, sondaı-aq «Han Táńiri», «Solnechnaıa dolına», «Aspantaý», «Apple Park» turǵyn úı keshenderin jáne týrıstik ınfraqurylym obektileriniń órtke qarsy qorǵalýyn qamtamasyz etedi. Qyzmet kórsetý aımaǵynda 40 myńnan astam adam turady jáne 255 sharýashylyq sýbekti jumys isteıdi, — delingen habarlamada.
Mamandandyrylǵan bólimsheni qurý Memleket basshysynyń Almatydaǵy jyl saıyn myńdaǵan qala turǵyndary men qonaqtar baratyn týrıstik jáne taýly aımaqtardaǵy qaýipsizdikti kúsheıtý jónindegi tapsyrmasy aıasynda júzege asyrylǵanyn atap ótken jón.
Bólimsheniń jaýyngerlik esepke engizilýi órt sóndirý-qutqarý qyzmetteriniń jedel daıyndyǵyn arttyryp, Almatynyń taýly aımaqtaryna keletin qala turǵyndary men kóptegen týrısterdiń qosymsha qaýipsizdigin qamtamasyz etedi.
Osyǵan deıin Atyraýdyń Reseımen shekarasyndaǵy Bókeıhan aýylynda órt sóndirý deposy ashylǵanyn jazdyq.