Almatyda taýǵa shyqqan úsh qyz tik betkeıden ózdiginen túse almaı qalǵan
ASTANA. KAZINFORM — Almaty oblysy Talǵar aýdany Býkreev shyńy mańynda teńiz deńgeıinen 3010 metr bıiktikte Almaty qalasynyń Monıtorıng jáne jedel áreket etý ortalyǵynyń qutqarýshylary 2007 jyly týǵan úsh qyzǵa kómek kórsetti. Bul týraly TJM málim etti.
— Tik betkeıge baılanysty qyzdar taýdan ózdiginen túse almaı, qutqarýshylardan kómek suraǵan. Olarmen turaqty baılanys ornatylyp, ornalasqan jeriniń geolokatsııasy anyqtalǵan. Qutqarýshylar qyzdardy Besaǵash kentine qaraı baǵyttalǵan avtomobıl jolyna deıin aman-esen alyp tústi, — delingen habarlamada.
Olarǵa medıtsınalyq kómek qajet bolǵan joq. Qyzdar ári qaraı joldaryn óz betterinshe jalǵastyrýdy josparlaǵan.
Aıta keteıik, jyl basynan beri qutqarýshylar 70 myńnan astam shaqyrtýǵa shyǵyp, 8 myńnan astam adamdy qutqarǵan. Taǵy 9 myńnan astam adam qaýipti aımaqtardan evakýatsııalanyp, 3 myńǵa jýyq zardap shekken adamǵa medıtsınalyq kómek kórsetilgen. Elimizde jyl saıyn 18 myńnan astam tabıǵı jáne tehnogendik tótenshe jaǵdaı tirkeledi. Onyń shamamen 12 myńy – órt.