Almatyda taýǵa shyǵarda tirkeletin saıt ashyldy
ALMATY. KAZINFORM – Almatyda taýǵa shyǵatyn sapary týraly aldyn ala habarlaýǵa múmkindik beretin Almaty Hike onlaın-servısi iske qosyldy.
Jobany Almaty qalasynyń Tabıǵat qorǵaý prokýratýrasy, Іle-Alataýy memlekettik ulttyq tabıǵı parki, ál-Farabı atyndaǵy Qazaq ulttyq ýnıversıteti, Tótenshe jaǵdaılar departamenti jáne Almaty qalasynyń ákimdigi birlesip ázirlegen. Bul týraly Almaty qalasynyń Óńirlik kommýnıkatsııalar qyzmeti alańynda aıtyldy.
- Qazir biz bul jobany is júzinde iske asyrýǵa kirisip jatyrmyz. Negizgi maqsatymyz - taýǵa shyǵatyn týrısterdiń sanyn bilip otyrý, olardyń qaýipsizdigin qamtamasyz etý jáne qajetti saqtyq sharalaryn saqtaýyn baqylaý. Eń aldymen, servıs týrısterge qaýipsizdik erejeleri men aýa raıy jaǵdaılary týraly aqparat berýge arnalǵan. Sonymen qatar, joba Almaty qalasynyń qutqarý qyzmetteriniń jumysyna járdemdesýdi, týrısterdiń joǵalyp ketý qaýpin azaıtýdy jáne jaraqat alǵan jaǵdaıda jedel kómek kórsetýge yqpal etýdi kózdeıdi, - dedi Almaty qalasynyń mamandandyrylǵan tabıǵat qorǵaý prokýrory Arman Nuǵyrbekov.
Almaty Hike saıty arqyly týrıster marshrýttyń qaı ýaqytta bastalatyny týraly aqparatty aldyn ala engizip, baılanys derekterin qaldyra alady. Ol úshin saıtqa kirý nemese taýly aımaqtar men ulttyq parkterge qatynaıtyn avtobýstar men aıaldamalarda ornalastyrylǵan QR-kodty skanerleý qajet.
Tirkelý birneshe mınýtty ǵana alady. Paıdalanýshy elektrondy nysandy toltyryp, telefon nómiri men baǵyty týraly málimetterdi engizedi. Marshrýt aıaqtalǵannan keıin saıtqa qaıta kirip, taýdan oralǵanyn belgileý mańyzdy.
TJD ókilderiniń aıtýynsha, aldyn ala tirkelý - josparlanǵan sapar týraly aqparatty qutqarý qyzmetterine erterek jetkizýge múmkindik beredi. Tótenshe jaǵdaı týyndaǵan jaǵdaıda bul málimetter týrısterdi izdeýdi jeńildetip, izdestirý-qutqarý jumystary kezinde qutqarýshylardyń jaǵdaıdy jyldam baǵalaýyna kómektesedi.
Eske salaıyq, buǵan deıin Almatyda Aıýsaı sarqyramasy mańynda adasyp ketken balalar qutqaryldy.
