Almatyda taýdan denesi tabylǵan polıtseıdiń ólimine qatysty tergeý aıaqtaldy
ALMATY. KAZINFORM — Almaty polıtsııasy 37 jastaǵy Aslan Álserovtiń ólimine qatysty tergeýdi aıaqtady.
23 maýsymda Almaty oblysy Kegen aýdanynyń taýly aımaǵynan, tasjoldan shamamen 400 metr qashyqtyqta er adamnyń órtengen denesin shopan taýyp alǵan. Keıin marqumnyń Almaty qalasy Áýezov aýdandyq polıtsııa basqarmasynda aǵa jedel ýákil bolyp qyzmet etkeni anyqtaldy.
Kisi óltirýge qatysy bar degen kúdikpen marqumnyń jubaıy men kámeletke tolmaǵan eki jasóspirim ustaldy. Áıel de buǵan deıin polıtsııada jumys istegen.
29 qyrkúıekte qylmystyq is prokýratýraǵa joldandy.
— Osy fakti boıynsha Almaty polıtsııa departamentiniń Tergeý basqarmasy sotqa deıingi tergep-tekserýdi aıaqtady. Belgilengen tergeý retine sáıkes, qylmystyq is materıaldary sotqa joldaý máselesin sheshý úshin Almaty prokýratýrasyna jiberildi, — dep málimdedi qalalyq polıtsııa departamenti.
Qylmystyq is aýyrlatatyn mán-jaılar kezinde adam óltirý baby boıynsha tergeldi.
Eske salaıyq, Óskemende polıtseıdi óltirgen er adam ustalǵan edi.
