Almatyda taýdaǵy kólderdiń sý deńgeıin tómendetý boıynsha jumys bastaldy
ALMATY. KAZINFORM — Almatynyń taýly aımaǵynda sel júrýiniń aldyn alý maqsatynda «Qazseldenqorǵaý» MM kúshterimen muzdaq kólderdegi sý deńgeıin retteý boıynsha aldyn alý sharalary júrgizilip jatyr.
TJM málimetinshe, qazirgi ýaqytta Almatynyń bıik taýly aımaǵyndaǵy 6 muzdaq kólde jumystar bastalǵan. Mamandar artyq sýdy burý jáne kólderdegi qaýipsiz sý deńgeıin ustap turý jumystaryn qamtamasyz etýde. Sondaı-aq sý burý arnalarynyń jaǵdaıyn jaqsartyp, olardy qalpyna keltirý jumystaryn atqaryp jatyr.
Al Kishi Almaty ózeni basseınindegi muzdaq kólge sýdy soryp shyǵarý jáne baqylaýly túrde burý úshin polıetılendi sıfondyq qubyrlar jetkizilgen.
— Muzdaq kólderdiń basym bóligi jetýi qıyn bıik taýly aımaqtarda ornalasqandyqtan, qubyrlardy, jabdyqtar men qajetti materıaldardy jetkizý jumystary «Qazavıaqutqarý» tikushaqtaryn jumyldyra otyryp júzege asyrylady. Polıetılendi qubyrlar sıfondaý ádisimen muzdaq kólderdegi sý deńgeıin qaýipsiz belgige deıin tómendetý úshin paıdalanylady, — dep habarlady TJM.
Sonymen qatar TJM Almatynyń taýly aımaǵyndaǵy gıdrologııalyq jáne sel jaǵdaıy baqylaýda ekenin atap ótti.
Eske salaıyq, Almatyda sel qaýpiniń aldyn alý maqsatynda muzdaq kólderdiń jaı-kúıin táýlik boıy baqylaıtyn bes bıik taýly maýsymdyq baqylaý beketi jumysyn bastady.
